Aeroplani presidencial Air Force One, ku udhëtonte Presidenti i SHBA, Donald Trump, drejt Zvicrës për samitin e Forumit Ekonomik Botëror në Davos, u detyrua të ndryshojë kurs dhe të kthehet mbrapsht në Uashington pas një problemi elektrik.
Sipas raportimeve, dritat në kabinë u fikën për pak kohë menjëherë pas ngritjes, duke alarmuar ekuipazhin.
Sekretarja e shtypit, Caroline Levitt, konfirmoi se vendimi për t’u kthyer u mor menjëherë pas zbulimit të defektit.
Pas uljes në bazën ajrore Andrews, presidenti u nis sërish me një avion presidencial rezervë, duke shkaktuar një vonesë prej rreth dy orësh në itinerarin e tij.
Në një intervistë për NewsNation, Trump përsëriti qëndrimin e tij mbi Groenlandën, duke e cilësuar si “të rëndësishme për sigurinë kombëtare dhe ndërkombëtare”.
Ai shtoi se projekti i “Kupolës së Artë” do të bëhet më efektiv me përfshirjen e Groenlandës, duke lënë të hapur mundësinë e një marrëveshjeje me Evropën, ndoshta edhe gjatë ditëve të samitit në Davos.
Pavarësisht incidentit, burime pranë administratës amerikane kanë konfirmuar se udhëtimi i presidentit nuk është ndikuar në mënyrë thelbësore.
Trump pritet të mbërrijë në Davos sot, ku do të mbajë fjalën e tij në sesionet kryesore të Forumit Ekonomik Botëror, duke u fokusuar në çështje globale, ekonomike dhe të sigurisë.
