Pas ndeshjes së luajtur në kryeqytet ndaj Salzburgut, zyrtarët e klubit të kuq kanë nisur përgatitjet për transfertën austriake. Por, gjatë ditës së djeshme, klubi është përballur me një problem serioz, pasi tre futbollistë nuk mund të udhëtojnë pa vizë në drejtim të Austrisë dhe për këtë arsye është kërkuar pajisja e tyre në ambasadën përkatëse.
Labinot Ibrahimi, Ylber Ramadani dhe Sodiq Atanda duhet të plotësojnë disa procedura burokratike që të pajisen me vizë dhe koha e shkurtër në dispozicion duket se nuk premton shumë për futbollistët. Kështu që klubi i kuq është vënë në alarm gjatë ditës së djeshme dhe po punohet për zgjidhjen e këtij ngërçi, pasi mungesa e tre futbollistëve në sfidën ndaj Salzburgut do të ishte një humbje e madhe për trajnerin Sormani. Italiani nuk do të ketë të gatshëm për përballjen e radhës Kalarin dhe tre futbollistët që janë të domosdoshëm, pasi janë projektuar si titullarë.
Deklarata
Drejtori i Përgjithshëm i Partizanit, Genc Tomori, në një prononcim për “Panorama Sport”, ka folur në lidhje me këtë problem, por sipas tij kjo nuk është hera e parë që klubi përballet me të. “Ne kemi zhvilluar edhe herë të tjera udhëtime në vende të ndryshme dhe për këta tre futbollistë është kërkuar vizë. Sot (dje), punonjës të klubit kanë qenë në Ambasadën Austriake dhe ata kanë disa rregulla procedurash të tyre, të cilat do të mundohemi që t’i plotësojmë në mënyrë që lojtarët të pajisen me vizë.
Do të komunikojmë zyrtarisht edhe si klub me ambasadën që gjithçka të zgjidhet dhe besojmë se nuk do të shkojmë deri aty sa lojtarët të mungojnë”, ka thënë Tomori. Ndeshja e kthimit mes Salzburgut dhe Partizanit do të luhet të mërkurën e ardhshme, në orën 20:30 dhe Partizani do të mundohet që të përmbysë humbjen e pë- suar në Elbasan për të siguruar edhe kualifikimin.