EKSKLUZIVE/ Një derbi nën presionin e rezultatit do të jetë ai i nesërmi midis Partizanit e Dinamos në stadiumin kombëtar “Qemal Stafa”. Kështu e sheh Adnand Ocelli, kapiteni i fundit i të kuqve që ka ngritur lart trofeun e titullit kampion.
Më 1993, Ocelli ishte lideri i skuadrës së kuqe të drejtuar nga Sulejman Starova. Që atëherë kanë kaluar 23 vjet pa titull dhe Ocelli e sheh si një kohë tepër të gjatë për një klub si të kuqtë.
“Shpresoj që titulli të kthehet te Partizani, sepse ka kaluar një kohë shumë e gjatë. Për pretendimet që ka ky klub dhe tifozët e tij, është një periudhë e papranueshme”, thotë Ocelli për JavaNews.
Por ish-mbrojtësi thotë se Partizani duhet të bëjë ecurinë e përkryer deri në fund të kampionatit, çka duket tepër e vështirë, pas lëkundjeve të shpeshta.
“Skuadra ka gabuar shpesh dhe kjo ka sjellë shkëputjen e Skënderbeut. Nuk është ndonjë diferencë e madhe, Skënderbeu mund të kapet, por me kusht që Partizani të mos bëjë më gabime. Shpresoj që skuadra ime të fitojë dhe t’i japë fund kësaj periudhe pritjeje”, thotë Ocelli.
Të kuqtë janë skuadra e vetme që mund të rivalizojë Skënderbeun, pasi Tirana e vendit të tretë ka dhjetë pikë më pak se Partizani. Bardheblutë nuk synojnë më titullin, por objektiv mbetet Europa.
“Asnjërës prej skuadrave nuk u lejohet që të gabojnë. Partizani mund ta quajë të humbur titullin nëse Skënderbeu shkëputet edhe më tepër, ndërsa Tirana rrezikon vendin e tretë, ndërkohë që fitorja e afron disi me Partizanin dhe mund të synojë vendin e dytë. Mendoj se do të luajnë të dyja për fitore, pasi barazimet nuk janë të volitshme për objektivat që kanë”, parashikon Ocelli.
“Për këtë arsye them se do të jetë lojë sulmuese nga ana e të dyjave. Sigurisht që rezultati ka përparësi në këtë takim dhe në këto kushte që janë skuadrat, por besoj se nuk do të mungojë loja e bukur. Kur skuadrat shfaqin mentalitet sulmues në fushë, loja e bukur nuk mungon”.
Derbi ka pasur si garniturë dëmtimet dhe mungesat, edhe pse trajnerët tashmë do të kenë më tepër mundësi zgjedhjeje. Për Partizanin është i gatshëm Mazrekaj dhe për Tiranën Elis Bakaj.
Ocelli në njëfarë mënyre i injoron mungesat.
“Lojtarët e mirë gjithmonë i japin diçka më tepër skuadrës, por në derbin Partizani-Tirana mungesat nuk ndihen. Edhe kur nuk ka pasur lojë të bukur, kanë qenë gjithmonë ndeshje luftarake. Kështu do të jetë edhe këtë herë. Nëse ka mungesa, lojtarët e tjerë i kompensojnë ato, ndaj nuk i shoh si të rëndësishme”.
Partizani-Tirana luhet shumë edhe në tribuna, me tifozeritë respektive që janë në garë kush të dhurojë më tepër spektakël, ndërkohë që nuk kanë munguar as episodet e dhunës.
Ocelli shpreson të jetë vetëm e para: “Janë dy tifozeri që i mbështesin fort skuadrat. Do të doja që edhe nesër të bënin të njëjtën gjë, të përkrahin skuadrën e tyre, të japin shfaqje në shkallët e stadiumit, duke lënë mënjanë incidentet, sepse janë gjëra që sjellin vetëm dëm, asnjë të mirë”.
JavaNews / Dritan Ikonomi
