Prishtina për ditë e më shumë i ngjan TIranës për kaos, zhurmë dhe mungesë rregulli.
Banorë të rrugës “UÇK” në kryeqytet i kanë dërguar tri ankesa në dy muajt e fundit në Komunë në lidhje me uzurpimin e hapësirës publike, por asnjë veprim nga autoritetet komunale nuk është ndërmarrë. Së fundi kanë bërë një peticion, të cilin e kanë nisur në adresë të njëjtë me besimin se hapësira dedikuar atyre do të lirohet.
“E kemi nënshkruar edhe një peticion dhe e kemi dërguar në Komunë, mirëpo as pas kësaj nuk kemi marrë përgjigje”, ka thënë banori Bedri Haxha, teksa ka treguar se në peticion janë nënshkruar 26 familjarë. Haxha, i cili pohohet edhe nga fqinji i tij, Enver Muçaku, ka theksuar se bashkë me bllokimin e trotuareve u janë uzurpuar edhe parkingjet, të cilat, sipas tij, para luftës kanë qenë ekskluzivisht në shfrytëzim të 44 familjeve që jetojnë në ndërtesë, referuar Koha Ditore.
