Prishtina mbledh të hënën mbi 120 studiues të albanologjisë nga mbarë bota
Në fillimjavë në Prishtinë nis Seminari tradicional i Albanologjisë, i cili do të zgjasë deri më 28 gusht. Mbi 120 studiues do të shpalosin kumtesat e tyre në edicionin e 34-t të Seminarit Ndërkombëtar të Gjuhës, Letërsisë dhe Kulturës Shqiptare. Pjesëmarrjen në këtë edicion e kanë konfirmuar edhe 130 studentë, të cilët do t’i ndjekin kurset e gjuhës shqipe në tri nivele. Duke nisur nga sot (e hënë) për dy javë rresht, studiues nga vende të ndryshme të botës do të paraqesin hulumtimet e tyre në fushën e gjuhësisë, letërsisë e kulturologjisë.
Drejtori i Seminarit, Rrahman Paçarizi, ka thënë se sa u përket sesioneve shkencore sivjet ka një risi në krahasim me vitet e kaluara. Sipas tij, përveç sesionit të gjuhësisë dhe letërsisë, sivjet do të ketë edhe sesion të punës në fushën e kulturologjisë. “Temë bosht nga gjuhësia është ‘Shqipja në domenin publik’, nga letërsia ‘Letërsia dhe religjioni’, ndërkaq në fushën e kulturologjisë tema bosht është ‘Kultura shqiptare në transicion’”, ka thënë Paçarizi, cituar nga Koha Ditore. Sipas tij, gjatë dy javëve të Seminarit do të ketë çdo ditë nga dy ligjërata të autorëve eminentë. Mes tyre, ka përmendur studiuesin nga Kanadaja, Robert Austin, i cili do të paraqitet me një ligjëratë për Fan Stilian Nolin. Në vitin 2011, Robert Austin kishte promovuar librin “Fan Noli dhe revolucioni i humbur”, botuar nga Botimet KOHA. Paçarizi ka përmendur në mesin e ligjëruesve edhe ministrin e Arsimit, Shkencës e Teknologjisë, Arsim Bajrami, dhe ish-ministrin e Punëve të Jashtme, Enver Hoxhaj. Ky i fundit do të ligjërojë për diskursin e Kosovës në diplomaci.
“Do të ketë një ligjëratë nga Bardhyl Demiraj për rolin e shqiptarëve në oborrin e mbretërisë austro-hungareze”, ka thënë Paçarizi, tek ka shtuar se pret që ky edicion i Seminarit të jetë i suksesshëm, sepse organizimi është bërë me kohë dhe mbështetja ka qenë mbi nivelin që e kanë pritur organizatorët.
“Në fushën e gjuhësisë ne presim që të sigurojmë të dhëna dhe të ndërtojmë një lloj databaze lidhur me gjendjen e shqipes së sotme. Ne do t’i kemi të dhënat për përdorimin e shqipes standarde në domenin publik, administratë dhe arsim”, ka thënë Paçarizi, sipas të cilit po ashtu pritet të shihet se cilat janë hulumtimet e studiuesve sa i përket pranisë së elementeve religjioze në letërsinë shqipe.
