Shkarkimi i ministrit Ljubomir Mariç ka prishur unitetin brenda përfaqësuesve serbë, të cilët deri më tani kanë vepruar të bashkuar rreth Listës Serbe. Mariçi është shkarkuar pas shoqërimit që i bëri Marko Gjuriçit gjatë hyrjes ilegale në Kosovë.
Pavarësisht thirrjeve të bashkëkombësve të vet, Mirjana Jevtiç të martën ka nisur punën në krye dikasterit të Pushtetit Lokal, shkruan Koha Ditore.
Ky veprim ka irrituar Listën Serbe, e cila përmes Zyrës për Kosovë në Qeverinë e Serbisë ka paralajmëruar se kjo nuk do të kalojë pa pasoja.
Edhe pse veprojnë në kuadër të Listës Serbe, dy rrymat politike ekzistojnë brenda saj – njëra me shefin e tashëm të Zyrës për Kosovën në Qeverinë serbe, Marko Gjuriç, dhe tjetra me ish-përfaqësuesin e Serbisë në Kosovë, Aleksandar Vulin. Mediet serbe kanë raportuar se Jevtiç vjen pikërisht nga radhët e Partisë së Vulinit. (b.an)
