Nga Mero Baze
Albin Kurti dhe Isa Mustafa janë në javën e fundit të dështimit të mundshëm të formimit të qeverisë, së dalë nga zgjedhjet e 6 tetorit, por kjo duket se nuk është fare shqetësim i SHBA . I dërguari i Posaçëm i presidentit Trump për negociatat e paqes ndërmjet Kosovës dhe Serbisë, ambasadori Richard Grenell, ka shpallur prioritet jo aq shumë arritjen e marrëveshjes Kurti-Mustafa, por arritjen e e marrëveshjes Kosovë-Serbi.
Pas takimeve në Kosovë dhe Beograd, ambasadori Grenell, ka kërkuar që Serbia të ndalë betejën kundër njohjes së Kosovës, kurse Kosova të heqë taksën për Serbinë, si hapa që çojnë drejt krijimit të klimës për mbylljen e marrëveshjes. Injorimi i negociatave të lodhshme të “fitimtarëve” të Kosovës në zgjedhjet e fundit, dhe imponimi për t’u angazhuar në marrëveshjen Kosovë-Serbi, si një kusht për zhvillimin ekonomik të Kosovës, nga ana e të dërguarit të presidentit Trump, tregon prioritetet e ndryshme të klasës politike në Kosovë me ato të SHBA për Kosovën.
Qysh në fushatën e zgjedhjeve të 6 tetorit, ajo që binte në sy, ishte se asnjë nga politikanët e Kosovës, nuk e bëri temë të debatit politik në zgjedhje, marrveshjen Kosovë-Serbi. Përkundër kësaj, pati një fushatë populiste kundër saj, që pasoi taksën e qeverisë Haradinaj, që paraqitej si “shpëtim” i Kosovës në emër të patriotizmit. Në fakt taksa 100 për qind, u vendos si mekanizëm politik për të ndërprerë bisedimet Kosovë-Serbi që po udhëhiqeshin nga SHBA, dhe për t’u përdorur për luftë të brendshme politike, duke rikthyer retorikën e tradhtarëve dhe heronjve.
Për ta bërë dhe më të lehtë betejën për një armik kombëtar, u erdhi në ndihmë Edi Rama, i cili i plotësonte të gjitha kushtet formale si i tillë, pasi është i gjatë sa Vuçiç, është në luftë me “patriotët” Meta-Berisha dhe kishte zëvendesuar Ditmirin me Gentin. Kjo ishte dëshmia e parë e një fushate frikacakësh, që duke tentuar t’i shmangen problemit kryesor të Kosovës, shpikën realitete të tjera për opinionin publik, për të mos u përballur me të vërtetën që i priste si sfidë.
Edhe më e papërgjegjshme u bë kjo situatë pas zgjedhjeve. Në negociatat thuajse të neveritshme prej 6 tetorit deri më sot, në asnjë rresht dhe në asnjë paragraf të kushtëzimeve ndaj njeri- tjetrit, Isa Mustafa dhe Albin Kurti nuk kanë përmendur prioritetin kryesor të Kosovës, që janë bisedimet me Serbinë, të cilat kushtëzojnë të ardhmen perëndimore të Kosovës. Është folur për numra ministrash, për karrigen e ardhshme të presidentit, për votim dhe dorëheqje kryetarësh Kuvendi, janë ndarë agjenci e janë rindarë ministri, por askush nuk ka folur çfarë do të bëjnë me temën e pare, me të cilën do të ndeshet qeveria e re, nëse arrin të bëhet.
Dhe kjo është shumë e papërgjegjshme, pasi praktikisht nëse dy partnerët kryesore nuk kanë një qëndrim të përbashëkt për bisedimet, atëhere qeveria lind e vdekur dhe nuk i duhet askujt. Nga mënyra se si i dërguari i presidentit Trump u soll në selitë respektive të LDK dhe VV sot, kuptohet se e ka konstatuar këtë problem dhe i ka injoruar tërësisht negociatat e tyre për qeverinë, duke shpallur prioritet normalizimin e të ardhmes perëndimore dhe ekonomike të Kosovës.
“Njerëzit e dinë që një gjë e tillë duhet të ndodhë, por disa politikanë janë bllokuar në mënyrën e tyre të vjetër të menduarit dhe duan të debatojnë për gjithçka”, tha Grenell pas vizitës në Prishtinë. Dhe kjo do të thotë se vizita e të dërguarit të presidentit Trump në Prishtinë, praktikisht ka injoruar negociatat për një qeveri që nuk i hyn në punë.
Ai ka diktuar prioritetet, përse duhet të formohet një qeveri e re, dhe ato prioritete janë zhvillimi ekonomik i Kosovës, që vjen nga tejkalimi i ngërçit të izolimit prej mungesës së një marrëveshje për paqen me Serbinë. Kosovën do ta shpëtojë ajo qeveri që ka guximin e mjaftueshëm të ketë axhendën e SHBA, si axhendë të vet. Çdo qeveri tjetër, vetëm sa e degradon, jo vetëm të ardhmen perëndimore të Kosovës, por dhe vet mbijetesën e saj. Fatekqësisht në emër të “patriotizmit”.
