Princi Harry përmendi shërbimin e tij në Afganistan dhe sakrificat e ushtarëve atje në përgjigjen e tij ndaj Donald Trump, i cili kishte deklaruar se forcat e NATO-s në vend ishin “pak prapa vijave të frontit”.
Deklarata e presidentit amerikan shkaktoi reagime nga politikanët në Britani, si dhe nga veteranët dhe familjet e ushtarëve të rënë.
“Në vitin 2001, NATO thirri Nenin 5 për herë të parë – dhe të vetmen – në histori”, tha princi, i cili kishte shërbyer në vend, në një deklaratë.
“Kjo do të thoshte që çdo komb aleat ishte i detyruar të qëndronte pranë Shteteve të Bashkuara në Afganistan për të mbrojtur sigurinë tonë të përbashkët. Aleatët iu përgjigjën kësaj thirrjeje .”
Dhe ai vazhdon: “Shërbeva atje. Krijova miq për gjithë jetën atje. Dhe humba miq atje. Vetëm Mbretëria e Bashkuar pati 457 vdekje ushtarake.
”Mijëra jetë ndryshuan përgjithmonë. Nënat dhe baballarët varrosën bijë dhe bija. Fëmijët mbetën pa prindër. Familjet u lanë të mbanin barrën.
“Këto sakrifica meritojnë të kujtohen me ndershmëri dhe respekt, ndërsa të gjithë mbetemi të bashkuar dhe të përkushtuar ndaj mbrojtjes së diplomacisë dhe paqes .”Donald Trump tha në një intervistë për Fox të enjten se “nuk ishte i sigurt” nëse aleanca do të ishte në anën e SHBA-së nëse do të kishte ndonjëherë nevojë për të.
Ai shpjegoi se “nuk kemi pasur kurrë nevojë për ta, nuk kemi kërkuar kurrë asgjë prej tyre” dhe shtoi se “Ata do të thonë se dërguan disa trupa në Afganistan. E bënë dhe qëndruan pak prapa, përtej vijave të frontit”.
BBC i ka kërkuar Shtëpisë së Bardhë sqarime mbi deklaratën e presidentit. “Kontributet e SHBA-së në Aleancë janë të jashtëzakonshme krahasuar me vendet e tjera”, tha zëvendëszëdhënësja Anna Kelly, duke shtuar se premtimi i Trump për të rritur buxhetet e mbrojtjes së vendeve të tjera në 5% “e ndihmon Evropën të marrë përgjegjësi më të madhe për mbrojtjen e saj”.
Dhe sigurisht, ajo kujtoi Groenlandën: “SHBA-të janë i vetmi partner i NATO-s që mund të mbrojë Groenlandën. Presidenti është i vetmi që mund të përparojë interesat e NATO-s atje”, tha Kelly. Një total prej 51 vendesh dërguan trupa në Afganistan. Nga këto, 24 regjistruan viktima.
Shumica e vdekjeve ishin amerikane me një total prej 2,465, të ndjekura nga britanikët me 457 dhe kanadezët me 158. Nëse e përkthejmë numrin e vdekjeve në raport me popullsinë, SHBA-të kishin 7.9 vdekje për milion, Danimarka me 7.7 vdekje, Britania me 7.2 vdekje dhe Estonia me 6.7 vdekje.
