Akademia e Shkencave të Shqipërisë ka nderuar me titullin për harmoninë fetare At Nikolla Markun, priftin “rebel” të kishës ortodokse të Shën Mërisë në Elbasan.
Në fjalën e tij, kleriku shprehu keqardhje që “historia që fillon nga rilindësit, të cilët bënë çmos për ta çuar kishën ortodokse nga një organizim i vogël në një organizim më të madh me mentalitet historik të vërtetë, konstruktiv dhe demokratik, nuk është në drejtësinë e duhur”.
“Nuk duan shqiptarë, por të huaj – vijoi At Nikolla -. Historisë do t’ia kërkojmë më vonë, se do të na kërkojnë llogari fëmijët shqiptarë që kisha ortodokse shqiptare ta ketë kreun e saj, Sinodin, me trup dhe gjak shqiptar”.
At Nikolla Marku është arsimuar dhe veshur si prift nga kisha ortodokse e Maqedonisë, e cila është patrikanë më vete, duke injoruar tërësisht ndikimet e Kishës Greke si dhe Patrikanën e Stambollit.
Kisha Ortodokse Autoqefale e Shqipërisë, e drejtuar nga kryepeshkopi grek Anastas Janullatos, nuk e njeh Markun me pretendimin se ai është vetëshpallur prift dhe nuk njihet nga asnjë kishë në botë si i tillë.
