Një pikë karburanti në Prezë është grabitur nga tre persona të armatosur që ende nuk janë identifikuar. Ngjarja ndodhi rreth orës 01:45, kur punonjësi i karburanti u kërcënua me armë nga njëri prej autorëve, duke u detyruar që t’i dorëzonte atij xhiron që kishte bërë deri në atë moment.
Burime nga Policia thanë se dyshohet të jetë grabitur një shumë prej rreth 20 mijë lekësh të rinj. Burimet thanë se nisur nga deklarimet e të dëmtuarit, grabitja është realizuar nga tre persona. Ata kanë qenë duke lëvizur me një automjet dhe i janë afruar pikës së karburantit.
Punonjësi është afruar duke menduar se kishin shkuar për t’u furnizuar me karburant. Por sapo ka bërë disa hapa në drejtim të makinës së ndaluar, njëri prej autorëve ka zbritur duke i drejtuar armën në fytyrë.
I ka thënë që të nxitojë dhe t’i japë të gjitha paratë që kishte aty, në të kundërt do ta qëllonte. I frikësuar kur ka parë armën para syve, punonjësi ka marrë të gjitha paratë që kishte në kasë dhe ia ka dhënë autorit. Menjëherë sapo ka marrë paratë, personi i armatosur ka hipur në makinë dhe të tre personat janë larguar me shpejtësi nga vendi i ngjarjes.
Sipas dëshmisë së të dyshuarit, grabitësit kanë qenë pa maska, por ai nuk i ka njohur, pasi nga frika se mos e vrisnin, ka nxituar të bëjë atë që i kanë kërkuar dhe nuk ka fiksuar dot asgjë.
Policia ka sekuestruar pamjet e kamerave të sigurisë së karburantit, në mënyrë që të bëjë të mundur identifikimin e autorëve të ngjarjes. Ndërsa Policisë Rrugore i është kërkuar ndalimi i automjetit që është përdorur në këtë ngjarje.
Një tjetër veprim hetimor i policisë ka qenë marrja në pyetje e punonjësit te karbuantit. Atij i janë marrë deklarime të holëlsishme në lidhje me autorët e krimit, moshën, dialektin, si dhe të dhënat e automjetit.
Pas marrjes në pyetje të punonjësit të karburantit, policia ka nisur punën për evidentimin e personave që mund të kenë kryer grabitjen me armë duke verifikuar ata të dyshuar të ngjasojnë me përshkrimet e dhëna nga i dëmtuari.
Panorama
