Kreu i bashkisë së Tiranës Erjon Veliaj prezantoi projektbuxhetin për vitin 2016, teksa preku të gjitha aspektet që ky buxhet do të mbulojë dhe përmirësojë në kryeqytet.
Në prezantimin që zhvilloi në njësinë bashkiak numër 2 Veliaj u tha banorëve se vitin tjetër Bashkia do të nisë projektin e kthimit të sheshit Skëndërbej në një hapësirë pedonale. Duke ju referuar sheshit Republice në Paris të Francës, ku mijëra persona kryen homazhet e tyre në nder të viktimave të 13 nëntorit, Veliaj tha:
“Hapim Sheshin Skënderbej, me të filluar punimet për vitin tjetër. Ne sot s’kemi asnjë shesh, as për gëzim as për hidhërim”
Kreu Bashkisë ka risjellë në vëmendje problematikën me ujësjellësin dhe humbjet e tepërta në rrjet të ujit në masën 70 %. Veliaj i siguroi qytetarët se nuk do të ketë një rritje të çmimit të ujit në Kryeyqtet.
“Nuk kemi për të rritur çmimin e ujit por ta paguajnë ata që nuk e paguajnë dhe që e vjedhin. Momentalisht kemi 70% humbje në ujë. Pjesa e ndershme paguan, pjesa tjetër çan tubacionin, bën një lavash. Kompani që mbushin ujin nga çezma dhe ambalazhojnë. Kjo pjesë që nuk ka paguar deri tani do të vazhdojë të paguajë”, tha ai.
Veliaj shtoi se do të bëhen 10 ndërhyrje në parkun e liqenit, ku fillimisht do të krijohet një hapësirë për fëmijët. Në lidhje me njësinë bashkiake nr 2 Veliaj tha se do të ketë investime të mëdha.
“Njësia numër 2 kanë vlerën më të madhe të parave. Është njësia me numrin më të madh por edhe më korrektja Njësia pesë dhe njësia dy janë më korrekte për pagesën e faturave. Aty ku ka më shumë pagesë bashkia do t’ia shpërblejë me më shumë investime”, u shpreh Veliaj.
