Ambasadorja e Shqipërisë në Holandë, Adia Sakiqi, ishte e ftuar nga Universiteti “Haagse Hogeschool” për të biseduar me studentët mbi Integrimin Europian të Shqipërisë. Ambasadorja Sakiqi, prezantoi për studentët e masterit për “Studime Evropiane” rrugën dhe ecurinë e integrimit europian të Shqipërisë, ku u ndal në tema specifike si: anëtarësimi në NATO, marrja e statusit të vendit kandidat, dhe hapi i radhës, çelja e negociatave për anëtarësim në BE.
Në këtë kuadër ambasadorja prezantoi zhvillimet në Shqipëri dhe arritjet në rrugën e reformave sidomos në reformën për drejtësi, si dhe arritjet në politikën e jashtme, në ekonomi dhe turizëm. Me studentët u diskutua gjithashtu mbi zhvillimet e Procesit të Berlinit. Po ashtu, ambasadorja ftoi studentët që të informohen më shumë dhe të marrin pjesë në iniciativat e RYCO dhe WBF, me seli në Tiranë.
Më tej, prezantimi vazhdoi me sfidat në të ardhmen dhe kryesimin e OSBE nga vendi ynë në vitin 2020 si dhe iu kushtua vëmendje rolit konstruktiv dhe stabilizues të Shqipërisë në rajon dhe pjesëmarrjes tonë në forcat paqeruajtëse. Ky shkëmbim mendimesh ishte shumë i vlefshëm sepse studentët patën rastin të mësonin shumë për vendin tonë.
