Pesë studente ekselente iu bashkuan sot stafit të Departamentit të Administratës Publike (DAP) pas aplikimit në platformën punëtëmbarë.al ku rezultuan fituese për shkak të rezultateve të larta në studime me mesatare mbi notën 9. Studentet Cejrolina Bardhi, Hasie Kotarja, Rovalda Mema, Bora Selishta dhe Armela Seiti kanë nisur sot rrugëtimin në administratën publike me dëshirën për të sjellë transparencën dhe energjinë e tyre e cila do reflektohet në përkushtimin dhe përgjegjësinë në kryerjen e detyrave të përditshme në bashkëpunim me stafin e DAP.
Gjatë një interviste për Agjencinë Telegrafike Shqiptare, studentet të cilat kishin mbaruar në Fakultetin Ekonomik në degë si Administrim Biznes dhe Menaxhim Ekzekutiv u shprehën entuziaste për këtë mundësi pasi ishte eksperienca e tyre e parë dhe e shihnin si diçka pozitive për të ngjitur shkallët e karrierës. Ato gjithashtu u shprehën për pozicionet e tyre kryesisht si specialiste në sektore si politika dhe procedurat e rekrutimit në departamentin e administratës publike gjithashtu dhe në sektorin e qeverisjes së mirë dhe jetësimit të prioriteve, se kishin bërë vetë zgjedhjen e këtyre pozicioneve dhe mendojnë që administratës publike t’i japin energjinë dhe transparencën e brezit të ri.
Studentet ekselente për vendin e tyre të punës kishin aplikuar në platformën punëtëmbarë.al dhe ishin kontaktuar nga stafi i Departamentit të Administratës Publike (DAP) për të nisur punën në bazë të dokumentacionit përkatës dhe të mesatares së tyre. Punësimi i studentëve ekselentë në administratën publike si rasti i pesë studenteve, është nismë tashmë e zbatuar konkretisht nga ana e Qeverisë shqiptare, pjesë e Paktit për Universitetin.
