Prezantohet në Greqi për të parën herë certifikata e gjelbër dixhitale e Bashkimit Europian. Dokumenti synon rikthimin e lëvizjes së lirë të turistëve brenda hapësirës së përbashkët europiane, përmes një aplikacioni që lehtëson grumbullimin e të dhënave që faktojnë se ata nuk përbëjnë rrezik për përhapjen e COVID-19ës gjatë udhëtimit.
Prezantimi u bë në Athinë gjatë një konference, ku në krah të kryeministrit grek Kirjakos Mitsotakis, i pari që hodhi idenë e një dokumenti të tillë, ishte edhe presidenti i Këshillit Europian Charle Michel dhe nën/presidenti i Komisionit Europian Margaritis Shinas.
Certifikata e gjelbër që veç aplikacionit mund të jepet edhe e printuar, përmban kodin e përgjigjes së shpejtë, që pas skanimit nga autoritetet nëpër aeroporte, paraqet brenda pak sekondave të gjitha të dhënat e nevojshme për historikun që ka çdo shtetas europian me COVID-19ën.
Dokumenti lejon lëvizjen vetëm për vaksinuarit, ata që e kanë kaluar koronavirusin dhe personat që rezultojnë të painfektuar në testet e 72 orëve të fundit. Greqia synon që të nisë aplikimin e certifikatës brenda pak ditësh. Ndërsa shumë vende, si Franca e Spanja ta vendosin në përdorim pas 1 Qershorit, afat ky i përcaktuar nga Komisioni Europian. Certifikata e gjelbër dixhitale pritet të përshtatet edhe për lëvizjen e lirë të shtetasve nga vende jo-anëtare si Shqipëria.
/a.r
