Prokurorja e Gjykatës Speciale kërkoi sot nga 45 vite burg për ish-krerët e UÇK-së, Hashim Thaçi, Kadri Veseli, Rexhep Selimi dhe Jakup Krasniqi.
Duke komentuar këtë pretencë analisti Baton Haxhiu u shpreh në emisionin “Të Paekspozuarit” në MCN TV se “Specialija” po e rrënon Kosovën, moralisht, historikisht dhe në mënyrën njerëzore. Ndërsa analisti Mentor Nazarko kujtoi se faktori shqiptar në vitin 2011 refuzoi të bashkohej dhe të padiste akuzat për krime lufte që ishin bërë në atë kohë kundër UÇK-së.
Pjesë nga biseda
Baton Haxhiu: Unë jam tmerruar se çfarë rrëfimi kam dëgjuar sot nga prokurorët, domethënë njerëzit të cilët janë kriminelë dhe vrasës që nuk kanë luftuar për liri, por kanë luftuar për kontroll. Kurrë nuk do ta kishin këtë rrëfim fakti që ata janë te një bote tjetër dhe nuk e çajnë fare kokën se çfarë mendon opinioni publik në Kosovë për luftën edhe për gjëra të tjera. Unë nuk kisha besu kurrë që do të ndodhte, edhe pse gjykimi është politik, ka fillim politik, ka arrestim politik, edhe do të ketë përfundim politik.
Kam pas përplasje, edhe kam thënë nëse ne e bëjmë gjykatën speciale si të tillë, kjo gjykatë po na rrënon moralisht, historikisht, po na rrënon në mënyrë njerëzore.
Mentor Nazarko: Drejtësia e jashtëzakonshme është e ndaluar si rregull, bëhet vetëm në rrethana të veçanta në këtë kuptim.
Dhe së paku në njëfarë mënyre, GJKKO-ja te ne, janë drejtësi speciale, janë drejtësi e posaçme. Është e veçantë që është me afat sepse është drejtësi speciale që shkel parimet e përgjithshme të së drejtës. Për shembull, parimi i mbajtjes në paraburgim pesë vjetësh janë mbajtur këta të UÇK-së. Ky është një mostrum që e ka prodhuar vetë Kosova.
Behgjet Pacolli me të cilën unë nuk punoj më, por kam punuar, ka bërë diçka kundër kësaj. I kërkoi Sali Berishës që të votonte kundër themelimit të kësaj gjykate, që të bënte një tryezë të rrumbullake të faktorit shqiptar, pra, Berisha në krye në tryezë rrumbullake, ku kush ishin gjithë udhëheqësit të opozitës të Shqipërisë, Edi Rama, Ali Ahmeti, Thaçi, e gjithë të tjerë, ta kundërshtonin si komb gjykatën. Gjykata akuzonte UÇK-në që ka bërë krime, që ka shpërndarë drogë, që ka financuar luftën me drogë, që ka bërë trafik organesh. Dhe NATO e ka mbështetur këtë udhëheqësi kriminale. Berisha tha do ta votojmë, ne s’kemi gjë çfarë të fshehim.
Pacolli i kërkoi Thaçit ta padisim Dick Martin si shpifës se ka përdorur një argument të spitalit ushtarak të Beogradit, i cili thoshte nuk mund të bëhet trafik veshkash në kushtet e Shqipërisë nga ajo shpi e verdhë.
Kosova ka faj edhe për një arsye tjetër se vetë nga 1999 e këtej nuk i hetoi seriozisht krimet e luftës.
