Teksa kryente homazhet në nder të vioktimave të Parisit në ambasadën Franceze në vend, Presidenti Bujar nIshani tha se Shqipëria nuk është imune ndaj sulmeve terroriste.
“Rreziku i ekstremistëve dhe terroristëve nuk përjashton asnjë popull të lirë, asnjë shoqëri demokratike dhe asnjë vend që përçon civilizimin, përparimin, tolerancën dhe bashkëjetesën. Prandaj në këtë kontekst edhe Shqipëria si një vend që promovon këto vlera të mëdha të njerëzimit dhe të botës, të cilat konvergojnë të gjitha tek liria, nuk mund të përjashtohet nga agresioni i mundshëm i grupeve terroriste. Por kam konstatuar dhe kam vlerësuar të gjitha masat e marra nga agjencitë ligjzbatuese të shtetit shqiptar, të cilat janë plotësisht të angazhuara me kapacitete profesionale në partneritet të ngushtë me aleatët tanë, përfshirë edhe Francën për ta përballuar me shumë sukses. Kjo është një betejë shumë e madhe. Është një betejë globale dhe Shqipëria ka luajtur dhe do të vazhdojë të luajë rolin e saj të rëndësishëm në fitoren përfundimtare, siç e kam shprehur edhe më parë të lirisë mbi dhunën dhe të civilizimit mbi terrorin.”- tha Nishani.
Në lidhje me mundësinë nëse Presidenti e sheh të arsyeshme të mbledhë Këshillin e Sigurisë Kombëtare, Nishani u përgjigj kështu:
“Edhe njëherë dëshiroj të garantoj të gjithë qytetarët shqiptarë se për sa u përket çështjeve të sigurisë dhe stabilitetit të vendit, të gjitha institucionet janë shumë mirë të koordinuara. Madje ka pasur një realitet, i cili ka konvertuar me rezultate konkrete të bashkëpunimit të të gjitha këtyre institucioneve dhe agjencive. Çështja e mbledhjes së Këshillit të Sigurisë pjesë e diskutimit dhe e koordinimit mes institucioneve dhe do të realizohet në momentet më të përshtatshme të interesit të vendit.”- përfundoi fjalën e tij Presidenti.
