Presidenti i Tiranës, Refik Halili në prononcimin për mediat, kishte pretendime të mëdha për gjykimin, pas barazimit pa gola në derbi ndaj Partizanit.
Halili shpërtheu ndaj arbitrave për anulimin e golit në pjesën e parë, për pozicion jashtë loje.
Sipas tij, ajo që po i bëhet Tiranës nga gjykimi, është një masakër që bëhet me qëllim.
“Fakti është që që më bën përshtypje që si ka mundësi që neve na ndjekin njerëz të cilët ishin në VAR në Elbasan, përsëri ishin sot. Nuk kishin çfarë bënin me penalltinë. Unë e kam me atë skemën fantastike që bëjnë ato. Shikoni çfarë bëhet me atë vijë ku poshtë është një metër e 60, atje lart është një metër.
Kështu që kjo duhet të rregullohet, duhet të ndërhyje federata. Kam 5 vite ose 7 vite që nuk flas për arbitrat. Është një turp e masakër që ia bëjnë me dashje klubit tonë. Unë nuk do t’i lejoj personalisht, me gjithë stafin tim, me gjithë tifozët, do na gjeni të dera shtëpisë secilit, nga sot e tutje”, deklaroi Halili.
Ndeshja Tirana-Partizani, u mbyll në barazim pa gola, me bardheblutë që humbën edhe një penallti në fund.
/a.r
