Ledian Memushaj do të qëndrojë te Pescara edhe sezonin e ardhshëm dhe do ta udhëheqë skuadrën abruceze si kapiten edhe në Serinë A.
Një gjë të tillë e ka konfirmuar presidenti i Pescarës, Daniele Sebastiani, i cili në një intervistë që ka dhënë së fundmi për mediat italiane ka lënë të kuptohet se nuk ka asnjë shans që mesfushori i Kombëtares shqiptare t’i japë lamtumirën klubit që ai drejton gjatë kësaj vere, pavarësisht se për Memushajn interesohen disa klube italiane me Bolognën që e dëshiron me çdo kusht 29-vjecarin nga Vlora.
Drejtuesit e klubit nga Dal Ara kanë ofruar 2 milionë Euro për kartonin e kuqeziut ndërkohë që presidenti i Pescarës, Sebastiani e vlerëson kartonin e kapitenit të tij nga 4 deri në 5 milionë Euro.
Megjithatë edhe për një ofertë më të lartë se 2 milionë Euro vështirë se skuadra e Massimo Oddos do të privohej nga Ledian Memushaj.
I pyetur për interesimin e Bolognës për 29-vjecarin presidenti i Pescarës Sebastiani u shpreh: “Prej ditësh flitet për diçka të tillë, por gjërat janë shumë të qarta. Ju të gjithë e dini që Memushaj ka rinovuar kontratën me ne vetëm pak kohë më parë. Po ju them që kapiteni ynë nuk do të largohet nga Pescara dhe për këtë të jeni të sigurtë”, deklaroi numri 1 i klubit abrucez.
Ledian Memushaj është pjesë e “delfinëve”, prej dy vitesh teksa në sezonin e kaluar ai luajti një rol të rëndësishëm në ngjitjen e Pescarës në elitën e futbollit italian./a.m.
