Përmes një ceremonie të mbajtur në parlamentin e Kosovës, Presidenti vendit Hashim Thaçi është betuar përpara deputetëve të maxhorancës, teksa u vu re mungesa e opozitës në sallën e kuvendit.
“Tani jemi me një detyrë të re, për një Kosovë europiane, të integruar në BE dhe multietnike. Kam besim që do të vazhdohet me një qeverisje të mirë. Si President do jem garant i respektimit të Kushtetutës. Do jem faktor komunikues politik për të gjithë qytetarët e vendit. Më lejoni të falenderoj edhe Presidenten Jahjaga për punën e saj në këto 5 vite. Qytetarët e Kosovës meritojnë një vend të qetë, vende punë dhe standarte europiane.”- tha Thaçi.
Në këtë ceremoni, sipas Kushtetutës së Kosovës, presidenti betohet se do të angazhohet me gjithë fuqinë e tij për ruajtjen e pavarësisë, sovranitetit dhe integritetit territorial të Republikës së Kosovës. Presidenti betohet po ashtu se do të sigurojë liritë dhe të drejtat njerëzore e qytetare, respektimin dhe mbrojtjen e Kushtetutës dhe ligjeve, ruajtjen e paqes dhe mirëqenies së të gjithë qytetarëve të Republikës së Kosovës.
