Partia Socialiste e quan të pabesueshëm kreun e PD-së, me premtimet që ka bërë gjatë takimeve të tij në qytete të ndryshme të Shqipërisë. Olta Xhaçka, tha se premtimet e Bashës nuk bëjnë asgjë, vetëm se kthejnë Shqipërinë pas në kohën e borxheve të mëdha dhe krizës ekonomike.
Deklaratë për media e deputetes së PS, Olta Xhaçka:
Lulzim Bashën nuk e beson dot më askush.
Katër vjet në krye të Bashkisë së Tiranës dha vetëm premtime, i tha të gjithëve ‘PO’, por në fund nuk beri asgjë.
Si ministër i Transporteve Lulzim Basha do mbahet mend për skandalin e korrupsionit, mbi 240 milionë euro vjedhje, për të cilën u akuzua formalisht nga Prokuroria, por i bëri bisht duke paraqitur raport mjekësor.
Si ministër i Jashtëm, Lulzim Basha do të mbahet mend për tradhti kombëtare, duke shitur detin tek fqinjët.
Si ministër i Brendshëm do të mbahet mend për vrasjen e katër qytetarëve të pafajshëm, në mes të bulevardit të Tiranës, vetëm e vetëm pse patën guximin të protestonin kundër qeverisë së tij dhe Sali Berishës.
Kurse si kryetar i Bashkisë se Tiranës, Lulzim Basha do të mbahet mend si mashtruesi dhe dembeli më i madh, që katër vjet bëri veç zullume dhe skandale me lejet e ndërtimit.
Prandaj, Lulzim Bashën sot nuk e beson dot askush. Premtimet e tij nuk bëjnë asgjë veçse kthejnë Shqipërinë mbrapa, në kohën e borxheve të mëdha dhe krizës ekonomike.
