Edhe pse janë mbushur plot 2 vite nga hedhja e shortit në gjykatën e lartë për dosjen e 21 janarit, ende nuk dihet asgjë në lidhje me fatin e njërës prej cështjeve më të rëndësshme të këtyre dekadave.
Më 21 janar të vitit 2011 gjatë protestave të opozitës së asaj kohe u vranë 4 shtetas dhe ende, Gjykata e Lartë nuk ka caktuar një datë për të çelur procesin gjyqësor, ku të pandehur janë ish-komandanti i Gardës së Republikës, Ndrea Prendi; ish-shoferi e tij, Margarit Kume, dhe ish-komandanti i njësisë speciale, Agim Llupo.
Jo zyrtarisht deklarohet se dosja ndodhet në dhomë këshillimi, që do të thotë se gjyqtarët ende po mendohen se çdo të bëjnë me këtë dosje, apo nëse do të caktojnë një datë për të shqyrtuar rekursin që i bëri Prokuroria në atë kohë. Dosja ndodhet në duart e relatorit Edmond Islamaj dhe të 4 anëtarëve Guxim Zenelaj, Tom Ndrea , Artan Zeneli dhe Shkëlzen Selimi
Zyrtarisht nga ana tjetër, vetë Kreu i Gjykatës së Lartë Xhevair Zaganjori, në një takim me gazetarët në shkurt të këtij viti tha se brenda 6 muajsh dosja e 21 janarit do të niste shqyrtimin e saj.
Ish-komandanti i Gardës së Republikës, Ndrea Prendi u dënua me një vit burgim për akuzën e “vrasjes nga pakujdesia” të demonstruesit Faik Myrtaj, ndërkohë që vartësi i tij Agim Llupo u dënua me 3 vite për të njëjtën akuzë, për vrasjen e Ziver Veizit.
Për të dyja shkallët e gjyqësorit, Prokuroria nuk mundi të bindte se zyrtarët e Gardës i kishin vrarë ata me dashje të drejtpërdrejtë, pasi nuk arriti të sjellë dot një motiv. Po ashtu, për plagosjen e 7 të tjerëve, gjykatat u shprehën se nuk u gjetën predha të qitura nga armët e tyre. Ndërkohë që kanë mbetur pa autorë dhe Prokuroria nuk ka gjetur ende që nga 21 janari i 2011-s, se kush janë të dyshuarit e vrasjes së demonstruesve Hekuran Deda e Aleks Nika.
