Do dalë në pension apo do vazhdojë? Deri në fund të sezonit duket se do ta dëgjojmë shpesh këtë pyetje për Xhanluixhi Bufonin. Menaxheri i portierit të Juventusit, Silvano Martina, lë gjithçka të hapur.
“Është ende herët. Koha do ta tregojë se si do të ndihet. Edhe unë e shoh mirë dhe mund të luajë edhe për dy vite të tjera, por duhet të ketë atë zjarr brenda që të bën të ecësh përpara”, shpjegon për “RMC Sport”. “Do të jetë vetë ai, që do ta vendosë së bashku me Juventusin.
Nëse do të vazhdojë, do ta bëjë për të qenë protagonist, jo thjesht të koleksionojë prezenca”. Por Bufon nuk është një idhull vetëm në Torino. Në verë, Liverpuli do të ndahet nga Minjole.
Sipas ish-lojtarit të “reds”-ave, Sten Kolimor, skuadra e Klopit duhet të tentojë Xhixhin: “Liverpuli ka nevojë për një portier me përvojë dhe Bufon po mendon të dalë në pension në fund të sezonit. Përse të mos i bësh një superofertë?”.
