Jamie Carragher i ka bërë thirrje Arsenalit t’ia japë tani Arsene Wengerit lamtumiren që e meriton. Legjenda e Liverpoolit i bëri thirrje klubit londinez ta njoftojë largimin e Wengerit tani pas dy humbjeve turpëruese ndaj Manchester Cityt brenda pesë ditëve, transmeton Express.
Ai beson se kjo do të ishte mënyra më e mirë për trajnerin francez ta marrë lamtumiren që e meriton pas 21 viteve në shërbim të Arsenalit.
“Ata [tifozët] nuk janë më të interesuar. Sonte nuk erdhën për ta parë ndeshjen. Nuk po i kritikoj ata që nuk erdhën, sepse i kuptoj. Në fund të ndeshjes pati fishkëllima, por nuk ishte si sezonin e kaluar. Kësaj radhe pati zemërim. Tani është pothuajse koha e dorëheqjes. Ata thjesht po e presin trajnerin të largohet”, ka thënë Carragher.
“Njoftoni tani se do ta ndërroni trajnerin për sezonin e ardhshëm dhe jam i bindur se të gjithë në stadium, në studio televizive, çdo vend do të thotë ‘hajde, t’i japim këtij njeriu lamtumiren që e meriton’”, ka shtuar ai. (b.an)
