Gazetari sportiv Fatjon Baze ka analizuar këtë të martë fundin e edicionit në Kategorinë Superiore, finalen e Kupës së Shqipërisë që luhet mbrëmjen e sotme, si dhe sfidat vendimtare të fazës “Final 4”.
Sipas tij, të gjitha ekipet e mbyllën sezonin në pozicionet që meritonin, bazuar në atë çfarë kanë dhuruar gjatë gjithë edicionit.
Gazetari komentoi edhe ndeshjet e shumëpërfolura të fazës së katërt, për të cilat u hodhën akuza dhe dyshime të shumta.
“Finalja e mbrëmjes së sotme pritet të dhurojë emocione, pasi përballen dy ekipe që synojnë ta mbyllin sezonin me një trofe. Kemi një Egnatia me trajner të ri, Nevil Deden, dhe në këndvështrimin tim kjo është prova e parë reale e tij në stolin e rrogozhinasve. Them reale, sepse pavarësisht se ka drejtuar disa ndeshje, nuk mund të themi se gjithçka është përcaktuar vetëm nga fusha e lojës, duke parë mënyrën se si shkuan disa sfida të fazës së katërt. Pikërisht sot do të shihet më qartë se si do të adoptohen idetë e tij te skuadra.
Nga ana tjetër kemi Dinamon, e cila pavarësisht ulje-ngritjeve arriti objektivin e saj, që ishte pjesëmarrja në Europë. Fitimi i Kupës së Shqipërisë do të ishte qershia mbi tortë për ta. Kanë një trajner me eksperiencë, të cilit sfida të tilla i kanë rezultuar shpesh të suksesshme.
Sa i përket kampionatit, me atë që kemi parë gjatë këtij edicioni, mendoj se renditja finale është e duhura për të gjitha skuadrat. Secila ka marrë atë që meritonte bazuar në paraqitjet e saj.
Faza e katërt, edhe pse u shoqërua me shumë polemika dhe akuza, mendoj se duhet parë edhe me pak ironi, pavarësisht se gjithçka ishte një skandal.
E them këtë sepse nuk mbaj mend prej vitesh që faza e fundit e Superiores të jetë luajtur ndonjëherë plotësisht me ndershmëri.
Prej vitesh, faza e katërt ka treguar se kush është më i fortë nëpër tavolina dhe jo në fushën e lojës”, u shpreh Fatjon Baze.
Sipas tij favorit këtë sezon për të fituar Kategorinë Superiore mbetet Vllaznia që ka pasur një ecuri mjaft pozitive përgjatë gjithë kampionatit.
