Dy javë pasi familja e kërkonte, biznesmeni Ruzhdi Hoxha është gjetur fatkeqësisht i vrarë.
Lajmi raportohet nga mediat, teksa trupi i 43-vjeçarit është gjetur në Malin me Gropa, pranë Dajtit.
Hetuesit thonë paraprakisht se në trupin e viktimës janë konstatuar shenja dhune.
Mësohet se Policia ka ndjekur itinerarin e automjetit të viktimës, zbardhur nga dëshmitë dhe kamerat e sigurisë në rrugë.
***
Biznesmeni 43-vjeçar kishte humbur kontaktin me familjarët që me 20 Tetor.
4 ditë më vonë, djali i tij, kishte bërë denoncimin në polici, ndërsa rasti u bë publik për mediat të premten.
Pas kësaj policia nisi verifikimet dhe paraprakisht e hetoi ngjarjen si rrëmbim. Rezultoi se 43-vjeçari ka qenë duke pirë kafe në një lokal pranë një zdrukthtarie në rrugën dytësore të autostradës Tiranës-Durrës. Nga andej, ai është larguar me makinën e mikut të tij Ferdinant Rrushi, një i shpallur në kërkim ndërkombëtar për drogë.
Nisur pikërisht nga këto të dhëna mësohet se policia e ka thirrur atë për ta marrë në pyetje lidhur me këtë çështje, por ky i fundit ka deklaruar se e ka lënë Hoxhën në zonën e njohur si 3-shi pranë Kamzës dhe më pas është larguar.
Megjithatë, grupi hetimor ka arritur të kapë lëvizjet e makinës së përdorur nga Rrushi duke e gjurmuar atë nëpërmjet kamerave të sigurisë, të cilat mbërrijnë deri në zonën e njohur si Qafë Mollë, ku pas kontrolleve është gjetur edhe një parcelë me kanabis. Roja i parcelës ka treguar për policinë se lënda narkotike ishte pikërisht e shtetasit Ferdinand Rrushi. Gjatë hetimeve grupi hetimit gjeti edhe telefonin e 43-vjeçarit të hedhur pranë Shkollës së Bashkuar.
/a.r
