Zjarri në Karaburun nuk ka të ndalur. Në ditën e 9 nën pushtetin e saj, flakët janë duke përparuar drejt Parkut të Llogarasë. Në ndihmë për shuarjen e flakëve përveç forcave tokësore janë edhe helikopterët e ushtrisë, të cilët pasi mbushen me ujë në det, e hedhin atë në vatrat e zjarrit nga ajri.
Prerfekti i Vlorës, Flamur Mamaj, ka treguar për Klan News se situata aktualisht është e vështirë për t’u vënë nën kontroll për një arsye shumë të rëndësishme. Në ndihmë të flakëve është era e forta çka bën që zjarri të përhapet më me shpejtësi.
“Siç e shikoni në këtë erë të fortë që po fryn në këto momente dhe trupat që kemi në terren po luftojmë që ta mbajmë zjarrin në atë territor dhe me ndihmën e helikopterëve që po hedhin ujë në atë zonë. Situata e erës nuk na favorizon. Duhet që të tregojmë kujdes me të gjithë trupat që kemi në terren për të përmbyllur këtë aksion që vijon prej disa ditësh. Po hedhim ujë pafund në vatrat e zjarrit për të mos lejuar depërtimin e zjarreve në Parkun Kombëtar të Llogarasë. Në këto momente e kemi nën kontroll dhe shpresoj që me gjithë angazhimet kemi rreth 70 forca dhe dy helikopterë që hedhin vazhdimisht ujë në këtë zonë dhe shpresoj që me anë të këtyre forcave ta kemi nën kontroll”.
Ndërkohë për zjarrin që përparon në Llogara, Mamaj u shpreh se është e vështirë që të ndërhyhet nga toka për shkak të lartësisë. Megjithatë, ai deklaroi se forcat që janë në terren janë përgatitur për çdo situatë që mund të shfaqet në territor. Mamaj tha se shpreson që situata të vihet nën kontroll sa më shpejt, por “Me këtë erë është e pamundur”.
“Duke patur parasysh që atje lartësia është 1235 metra është e pamundur që të çohen forcat nga ana tokësore, por ato forca që kemi i kemi furnizuar me ujë dhe ushqime dhe po i mbajmë të zgjuar, jo vetëm për zjarrin por për çdo situatë që mund të shfaqet në atë territor”, tha Mamaj.
/a.r
