Analisti Preç Zogaj, duke iu drejtuar sekretarit të Përgjithshëm Të PD-së, Flamur Noka, në studion e emisionit “Të Paekspozuarit” në MCN TV, u shpreh se opozita është e fragmentarizuar dhe rezultati do të dalë në zgjedhje. Nga ana tjetër ai tha se opozita po përsërit sukseset e qeverisjes së saj, por ajo duhet të ndryshojë rrënjësisht mënyrën e komunikimit, duke e bërë më gjithëpërfshirëse.
“Opozita është e fragmentuar, janë disa parti në fushatë. PSD është në fushatë, por nuk e di nëse është më Ramën, ai thotë se është në mes. Fragmentimi është, do të dalë edhe në zgjedhje. Janë disa sondazhe, janë 4 kompani serioze që kanë besueshmëri në vendet nga vijnë dhe në Shqjpëri i kanë rënë në kokë brenda marzhit të gabimit. Fotografinë e zgjedhjeve ne e bëjmë përmes sondazheve dhe atyre që shihen. Se sa peshë do të ketë në zgjedhje kjo pritet ta shohim.
Opozita fokusohet te dështimet e qeverisë dhe e ndërton me to narrativën e saj, të cilat edhe i zmadhon pak dhe kjo nuk ndodh vetëm në Shqipëri. Rama të jep material sa të duash për të ndërtuar një narrativë të tillë. Është monotone narrativa e opozitës, sepse kjo gjuhë është që kur erdhi Rama në pushtet në vitin e parë. Opozita evokon arritjet e veta, unë kam qenë vetë në zgjedhjet e vitit 2017, dhe këtë kishte, këtë që thotë Flamuri sot. Arritjet e PD-së janë të njohura botërisht. Ka fituar zgjedhjet dhe ka humbur zgjedhjet sepse njerëzit kanë patur një përfytyrim tjetër.
Në konkurencën elektorale arritjet që janë hedhur një herë nuk hidhen më. Kjo bën që opozita të jetë vendnumëro. Opozita duhet të ndryshojë rrënjësisht mënyrën e komunikimit, më gjithëpërfshirës, që mbështetet në aktualitetin dhe jo në historinë e gjërave. Kjo lloj retorike Flamur është jo mëma e dijes, por më shumë babai i mërzisë, sa kohë që nuk pasurohet me risi”-tha Zogaj.
