Prapaskenat e raportit, a po e sponsorizon OSBE Lulzim Bashën duke goditur Berishën?
Pak ditë më parë mediat online publikuan një raport konfidencial të hartuar nga OSBE. Raporti në fjalë ishte hartuar, duke u bazuar në raportimet e mediave në vend apo edhe lajmeve që kanë qarkulluar, por të pa konfirmuara, ndërsa pjesë e tij ishin emrat e politikanëve kryesorë në vend. Raporti përmendte emrat e kryeministrit Edi Rama, kreut të Kuvendit Ilir Meta, ish-kryeministrit Sali Berisha, si dhe të disa deputetëve të Kuvendit. Në raport listoheshin akuza të forta për politikanët e përmendur, por ajo që bie më tepër në sy është se në të mungonte emri i kreut të opozitës, Lulzim Basha, i cili ka disa vite që është pjesë e politikës në vend, madje duke mbajtur edhe pozicione të rëndësishme. E ndërsa sipas OSBE-së, raporti ishte për përdorim të brendshëm dhe i bazuar në raportimet e medias, dyshimi rritet akoma më shumë, pasi për kryetarin e tanishëm të Partisë Demokratike ka pasur një numër të madh akuzash, kryesisht nga mediat e majta. Një ndër akuzat më të rënda ndaj tij ka qenë ajo për rrugën Durrës-Kukës, por edhe për “21 janarin” dhe për tenderët gjatë drejtimit të Bashkisë së Tiranës. Ky mënjanim i Bashës nga raporti i OSBE-së është akoma më i dyshimtë, kur në të raportohen disa akuza të rënda ndaj ish-kryeministrit Berisha, por edhe ndaj dy liderëve të mazhorancës, Rama dhe Meta.
Ndërkohë që disa burime thonë që raporti mund të jetë hartuar nga bashkëpunëtorët e Bashës pranë OSBE-së. Aq më tepër që dje, gazeta zyrtare e PDsë, “Rilindja Demokratike”, hapej me shkrim kryesor, pikërisht raportin e OSBEsë, duke sulmuar deputetët socialistë dhe duke e bërë në këtë mënyrë të besueshëm si raport.
Ndërkohë ish-kryeministri Berisha me një letër të gjatë drejtuar ambasadorit të OSBEsë në Tiranë, e cilësonte si paçavure raportin.
“Ky raport paraqet nje lloj kolektori të ujërave të zeza, që kanë qarkulluar si akuza, kundërakuza, shpifje, trillime, madje, siç shpreheni ju vetë, edhe thashetheme që nuk njohin kufije etike, morale dhe kohore dhe që, në tëerësi, janë bërë me gojë dhe me shkrim nga kundërshtaret e mi, në mediat e tyre, në kuadrin e një lufte politike”, shkruante Berisha.
E ndërsa Berisha e ka kritikuar ashpër këtë raport, deri tani Lulzim Basha nuk ka bërë asnjë deklaratë ndaj tij, por ka përdorur gazetën e partisë.
