Presidenti ukrainas Volodymyr Zelensky ishte duke u nisur nga Moldavia drejt Norvegjisë, kur avioni me të cilin udhëtonte u përball me një kërcënim nga një dron.
Lajmin e bëri të ditur kryeministri norvegjez Jonas Gahr Store në një intervistë për televizionin norvegjez NRK. Ai tha se Zelensky ia kishte treguar ngjarjen gjatë një bisede që patën pak para se të merrnin pjesë në ceremoninë mortore të mbretit Harald.
“Ky është realiteti me të cilin duhet të përballet presidenti ukrainas”, tha Store.
Edhe ministri norvegjez i Financave, Jens Stoltenberg, ishte i pranishëm gjatë bisedës. Ai konfirmoi se fluturimi i Zelensky-t ishte vonuar dhe se kishte pasur kërcënime ndaj avionit.
Megjithatë, Stoltenberg tha se nuk kishte mjaftueshëm informacion për të dhënë më shumë detaje.
Ai vlerësoi gjithashtu faktin që Zelensky kishte marrë pjesë në ceremoninë mortore dhe kishte qëndruar pranë liderëve të tjerë evropianë. Sipas Stoltenbergut, në udhëtimet e mëparshme të Zelenskyt jashtë Ukrainës, masat e sigurisë kanë qenë shumë të rrepta dhe daljet e tij publike kanë qenë të kufizuara.
Çfarë ndodhi me dronin?
Nga Kievi, ngjarja u paraqit si më pak alarmante.
Një burim pranë presidencës ukrainase i tha AFP-së se bëhej fjalë për një alarm në Moldavi, pasi një dron rus kishte hyrë në hapësirën ajrore moldave dhe më pas kishte kaluar në atë të Rumanisë.
Sipas këtij burimi, ishte e ekzagjeruar të thuhej se Zelensky kishte qenë në rrezik të drejtpërdrejtë.
Ministria e Mbrojtjes së Moldavisë konfirmoi se një dron i tipit Shahed kishte hyrë në hapësirën ajrore të vendit dhe më pas kishte kaluar në territorin ajror të Rumanisë.
Për shkak të incidentit, hapësira ajrore u mbyll përkohësisht dhe avionët luftarakë të NATO-s u ngritën në ajër.
Nuk është ende e qartë nëse droni kishte synuar avionin e Zelensky-t. Një nga mundësitë është që nisja e avionit të presidentit ukrainas të jetë shtyrë për arsye sigurie, për shkak të situatës që po zhvillohej në ajër.
Tensionet në rajon
Incidenti ndodhi në një kohë kur tensionet në hapësirën ajrore të vendeve pranë Ukrainës janë rritur ndjeshëm.
Vetëm një ditë më parë, Moldavia dënoi sulmet ruse ndaj Ukrainës pranë pikës kufitare Tudora-Starokozache. Sulmet shkaktuan dy viktima dhe disa të plagosur, mes tyre edhe pjesëtarë të rojes kufitare ukrainase.
Ngjarja me avionin e Zelensky-t tregon edhe një herë se lufta në Ukrainë po krijon rreziqe edhe për vendet dhe hapësirat ajrore përreth saj.
