Ardian Ozuni, i pandehur i dosjes “Plumbi i artë”, mohoi deklarimet e të penduarit Nuredin Dumani.
“Këtë monstër unë nuk e kam parë asnjëherë në botë. Nuk kam unë leverdi të hap sherre e të vras njerëz se kam familje të mrekullueshme. Për çfarë më duhej mitralozi mua? Thërrisni kë të doni këtu. Nëse unë kam takuar ndonjëherë Dumanin pranoj të dënohem. Janë të gjitha thashetheme. Nëse del një gjë e vërtetë nga ato që thotë Nuredini, unë do var veten në mes 313. Ose e ka mësuar dikush të trillojnë, nuk e di…”, u shpreh Ozuni.
Këtë të martë ka vijuar në Gjykatën e Posaçme seanca gjyqësore për dosjen “Plumbi i Artë”, ku i penduari i drejtësisë Nuredin Dumani ka dëshmuar sërish para avokatëve të të pandehurve të tjerë.
Dumani i është përgjigjur pyetjeve të avokates së Altin Ndocit, rreth ditës kur ai u arrestua nga policia pas një atentati të dështuar në 29 mars 2022 pranë fshatit Papër, në vendin e quajtur “Ura e Zezë”, në aksin rrugor Elbasan-Cërrik.
Ai ka rrëfyer se ishte nisur në Elbasan për të eliminuar Oti Kilën dhe se ka arritur të njohë Talo Çelën nga mjeti prej të cilit u qëllua në drejtim të tij.
DËSHMIA:
Avokatja Elda Zotaj: A ke bërë deklarime para OPGJ-ve të Elbasanit, pas momentin e arrestimit?
I penduari Nuredin Dumani: Nuk ju kam kthyer përgjigje të korruptuarve. Ata janë të korruptuar. Kur jam arrestuar në Fier më çuan në spital. Pastaj më çuan tek ushtaraku. Aty erdhën Kreshnik Ajazi, Tonin Vocaj dhe Ardian Cipa. Nuk kam firmosur gjë para tyre. Nuk më kanë marrë në pyetje.
Avokatja Elda Zotaj: Ku e ke dhënë deklarimin e parë pas arrestimit?
I penduari Nuredin Dumani: Mesa mbaj mend i kam dhënë tek Spitali i Burgut. Atje kam firmosur pas deklarimeve. Nuk mbaj mend nëse janë regjistruar në audio dhe video.
Avokatja Elda Zotaj: Ditën e arrestimit për cilën ngjarje u nise në Elbasan. Cili ishte i interesuar për vrasjen e Oti Kilës?
I penduari Nuredin Dumani: Suel Çela.
Avokatja Elda Zotaj: A të ka kontaktuar Alibej me telefonat e enkriptuar.
I penduari Nuredin Dumani: Më ka çuar letra dore.
Avokatja Elda Zotaj: A je në dijeni të ndonjë miqësie mes Oti Kilës dhe Hajdar Çopjes?
I penduari Nuredin Dumani: Nuk e di.
Avokatja Elda Zotaj: Ditën që u plagose, a i dallove personat që të qëlluan?
I penduari Nuredin Dumani: Jo nuk i kam njohur. Ishin të maskuar. Vetëm nga trupi shoferi më është dukur si Talo Cela.
