Prej datës 23 shtator, kanë nisur aplikimet për raundin e dytë në Universitet, për të gjithë ata maturantë që nuk fituan asnjë degë në fazën e parë. Janë më shumë se 15 mijë maturantë të cilët pritet të aplikojnë për herë të parë, ose të riaplikojnë për të fituar një nga kuotat e mbetura bosh në Universitet. Sipas ekspertëve të arsimit, maturantët të cilët kanë fituar në një preference, por nuk janë regjistruar, duhet ta rihedhin përsëri atë degë. Kjo për shkak se atë degë e kanë të sigurt që do ta fitojnë, ndërsa për degët e tjera, mund të ketë një numër të lartë aplikimesh dhe pakësohen mundësitë.
Pavarësisht se kanë ngelur me mijëra kuota të paplotësuara, një maturant në raundin e dytë mund të shpallet fitues në disa degë, në varësi të mesatares dhe kritereve që kanë vendosur vet universitetet. Ministria e Arsimit për tu ardhur në ndihmë maturantëve ka vënë në dispozicion portalin online, ku do të pasqyrohen në rezultatet e renditjes së maturantëve pas aplikimit për në raundin e dytë.
Ministria e Arsimit u bën apel maturantëve që të mos zgjedhin vetëm degët më të mira dhe të hedhin në 10 preferencat e tyre edhe degët që nuk janë shumë të kërkuara, në mënyrë që të kenë mundësi të fitojnë. Nga ana e tij, Kryeministri Rama përmes një video në rrjetin social “Facebook” e ka cilësuar reformën e arsimit që u aplikua, si sukses dhe çelje të një epoke të re transparente për gjeneratën e re.
Kalendari i aplikimeve ka filluar me kryeqytetin duke vijuar me Durrësin, Kamzën, Kavajën, Krujën ndërsa ditën e sotme aplikimet janë të hapura për maturantët e Elbasanit, Peqinit, Gramshit, Librazhdit, Korçës, Pogradecit, Kolonjës dhe Devollit. Fituesit do të shpallen me datën 6 të muajit tetor ndërkohë që regjistrimet do të nisin në 16 tetor.
ma.me
