Praga zyrtare mirëpriti rekomandimin e KE për të hapur negociatat e pranimit me Shqipërinë, si një njohje e qartë e progresit të Shqipërisë në zbatimin e reformave kyçe në dy vitet e fundit.
Rikonfirmimi i mbështetjes çeke ndaj integrimit të vendit tonë në BE, u theksua nga Ministri i Jashtëm i Republikës Çeke, Lubomir Zaoralek në takim me Ambasadorin e Shqipërisë, Riza Poda.
Në fokusin e këtij takimi ishte edhe zhvillimi i mëtejshëm i marrëdhënieve dypalëshe, perspektiva europiane, zhvillimet në rajon dhe në veçanti vizita e Ministrit të Punëve të Jashtme, Ditmir Bushati në Pragë.
Zaoralek vlerësoi si të shkëlqyer dhe tepër të rëndësishëm rolin konstruktiv dhe stabilizues të Shqipërisë në rajonin e Ballkanit si dhe kontributin e saj si një anëtare aktive e përpjekjeve të komunitetit ndërkombëtar në luftën kundër ekstremizmit dhe terrorizmit. Ai u shpreh se “Bashkëpunimi me Ballkanin Perëndimor konsiderohet si një nga çështjet kyçe për Republikën Çeke”.
Poda, falenderoi ministrin Zaoralek për mbështetjen që Republika Çeke i ka dhënë Shqipërisë, si dhe e njohu atë me ecurinë reformave të ndërmarra nga Qeveria Shqiptare, me qëllim plotësimin e prioriteteve kyçe, duke vënë theksin tek zhvillimet më të fundit në sistemin e drejtësisë.
Ministri Zaoralek theksoi, se duhet të vijojmë rregullisht me takimet dypalëshe, dhe u shpreh se mirëpriste me shumë kënaqësi realizimin e vizitës së radhës të Ministrit të Jashtëm, Ditmir Bushati në Pragë, duke sugjeruar edhe datat 28 ose 31 mars 2017 për këtë vizitë. /atsh/b.d
