Pas deklaratës së Prokurorisë së Përgjithshme në lidhje me gjurmët e gishtave të Agim Kajmakut, ku thoshte se është dërguar një kërkesë ku i kërkohet atij të dorëzojë gjurmët duke shtuar se kjo shkresë nuk ka mbërritur ende për shkak se shërbimi postar ka ngatërruar adresë, ka ardhur edhe një reagim nga Posta Shqiptare. Këto të fundit kanë deklaruar se kërkesa e ardhur nga Prokuroria e Përgjithshme është dorëzuar brenda 72 orëve në destinacion në përputhje me rregulloren mbi këto lloj dërgesash.
Sipas Postës Shqiptare nuk ka ndodhur ngatërresë dhe kërkesa është dorëzuar në adresën e Kajmakut me datë 29 gusht. Më pas në deklaratën e Postës Shqiptare thuhet se kjo është lehtësisht e verifikueshme pas është në sistemin e dërgesave nga barkodi përkatës dhe është firmosur nga sekretaria e Bashkisë Vorë.
Reagimi i Postës Shqiptare:
“Duke marrë shkas nga publikimet në media në lidhje me njoftimin e dalë nga Prokuroria e Përgjithshme për rastin e z. Agim Kajmaku, Kryetar i Bashkisë Vorë, sqarojmë se :
Të gjitha dërgesat postare të nisura nga Prokuroria e Përgjithshme janë të pajisura me BarCode dhe lehtësisht të verifikueshme. Sipas verifikimeve të kryera nga Drejtoria e Përgjithshme e Postës Shqiptare, rezulton se në emër të z. Kajmaku është dërguar nga Prokuroria e Përgjitshme më datë 26/08 një objekt postar (dërgesë postare me barkodin përkatës)
Më datë 29/08 është kryer dorëzimi i objektit, brenda 72 orëve, në përputhje me rregulloren mbi këto lloj dërgesash. Në sistemin e dërgesave, objekti postar në fjalë rezulton i dorëzuar pranë Bashkisë Vorë.
Ky fakt vërtetohet lehtësisht në dy mënyra:
1. Sistemin e dërgesave nga barkodi përkatës.
2. Prova e dorëzimit e firmosur nga sekretaria e Bashkisë Vorë.”
