Autoriteti për Informim mbi dokumentet e ish sigurimit të shtetit ka zhvilluar një veprimtari në përkujtim të 23 gushtit, Dita e Përkujtesës evropiane për viktimat e komunizmit dhe fashizmit. Me një ceremoni përkujtimore për viktimat e burgut në Porto Palermo, kryetarja e Kuvendit Elisa Spiropali tha se shumë jetë të pafajshme u “këputën” për shkak të ideologjisë së komunizmit.
Duke kujtuar historitë e të mbijetuarve, Spiropali u shpreh se të gjitha këto tragjedi të ndodhura në kampin e Porto Palermos duhen studiuar në mënyrë që shoqëria të shkëputet njëherë e mirë nga periudha komuniste dhe se vetëm duke njohur të shkuarën, e ardhmja do të jetë më e sigurt.
“23 gushti është shënuar nga PE si dita e përkujtesës evropiane për viktimat e komunizmit dhe fashizmit, ditë homazhi për ato jetë të këputura në mes, ato drama e fatkeqësi njerëzore të shënjuar nga dy skajet ekstreme të ideologjive, atë të nazi-fashizmit dhe komunizmi. Për të ecur para nuk duhet kthyer koka pas, por ajo që harrohet rrezikohet të përsëritet. Ka vetëm 3 dekada e pak që Shqipëria u nda nga e kaluara komuniste dhe për brezin e ri sot është e vështirë të kuptohet burgu i ndërgjegjes, ato tela me gjemba dhe plumbi që vriste më shumë pasi qëllohej në emër të ideologjisë. Edhe kur jeta e sjell që të prekësh pak histori para syve sot bëhet edhe më dramatike për shkak të kontrasteve. Porto Palermo dukej si gjetja më djallëzore e bashkimit mes bukurisë natyrore dhe shuarjes së kundërshtarëve në ketë burg. Për 13 muaj, nga 1949-1950 ky vend u tentua të bëhej varr ëndrrash e mal vuajtjesh njerëzore. Asgjë në botë nuk mund të jetë më e fortë se qenia njerëzore. Sot përkujtojmë 82 burrat, 62 gratë dhe 37 fëmijët që bashkëjetuan me vdekjen në birucat e kësaj kalaje, burrat u rrëmbyen përdhunshëm dhe u syrgjynosën në muret e kësaj kalaje. Gratë u nxorën pa mëshirë nga shtëpitë e tyre dhe u degdisën në muret e këtij burgu. Ato fëmijë e vajza të reja u shpallën armiq dhe u degdisën këtu. Kampi i Porto Palermos është një nga faqet që duhet studiuar dhe duhet të ndriçohet nga drita e njohjes për t’u ndarë përfundimisht me të. Mbijetesa e të burgosurve duhet të dëshmojë të vërtetën. Duke njohur të shkuarën do jetë më e sigurt edhe vetëm e ardhmja”, tha Spiropali.
Për kryetaren e Kuvendit këto histori tragjike duhet të shërbejnë edhe për jetën shoqërore-politike për të forcimin e institucioneve demokratike dhe respektimin e lirive edhe të drejtave të njeriut.
“Qëllimi ynë është që të riintegrojmë ish të përndjekurit në jetën shoqërore e politike të vendit dhe ish pronarët të gëzojnë pronat e tyre. Shoqëria dhe shteti duhet të njohin përmasat e kësaj traume politike, shoqëror dhe ekonomike dhe të krijojmë kushtet që të drejta dhe liritë e njeriut të lulëzojnë dhe institucionet demokratike të forcohen. Kuvendi do të bëjë më të mirën për të përmirësuar legjislacionin për ish të përndjekurit pasi këto çështje nuk janë partiake dhe do gëzojnë konsensusin e të gjithëve”, tha Spiropali.
Për 13 muaj nga viti 1949 deri në 1950 në Burgun e Porto Palermos humbën jetën 82 burra, 62 gra dhe 37 fëmijë dhe të rinj. Porto Palermo ka qenë një kamp internimi ku trajtimet çnjerëzore e kriminale ndaj të burgosurve të pafajshëm janë kryer gjatë viteve 1949-1950.
