Nga Artur Ajazi
Politikanët, nuk kanë pse të përjashtohen nga shtresa e njerëzve me “aftësi të kufizuara”. Përkundrazi, tek shtresa e njerëzve me “aftësi të kufizuara”, do të zbulosh aftësi të fshehura të tyre, apo dhe mundësi perfekte komunikimi për raste dhe natyra të veçanta jetësore. I madhi Bulka ka thënë “politika bëhet nga njerëz me aftësi të lindura”. Edhe në 45 vite periudhë komuniste, Enver Hoxha kishte aftësi të lindura, derisa mbijetoi aq gjatë, derisa fshiu nga faqja e dheut kundershtarët e tij politikë, të cilët kishin “aftësi të kufizuara” për të përballuar situatën e krijuar. Nuk mund të thuash se “X politikan ka vjedhur kaq miliona euro dhe është i zgjuar, i zoti”.
Aspak. Ky është dhe gabimi kryesor që bëjnë njerëzit kur vlerësojnë një politikan që i ka drejtuar ata, për një kohë të caktuar. Paraja kurrë nuk është standard i vlerësimit të politikanit. Në Shqipëri, gjithë kasta e politikanëve që kanë abuzuar dhe kanë vjedhur miliona dollarë dhe miliona euro, dhe që kanë bërë pasuri të madhe, mund të quhen “me aftësi të kufizuara”.
Ata rastësisht, fare rastësisht u gjendën në llogoren e gabuar, dhe prej andej bënë krime. Pra jo se ishin politikanë, por thjesht ishin dhe do të mbeten “ hajdutë dhe bajga tranzitore”. Në Tetor 1996, në takimin me një gazetar danez, tek flisnim për periudhën që po kalonte vendi ynë pas 1992, më tha “ky quhet tranzicion, dhe ju edhe për shumë vite do të shihni shumë njerëz tranzitorë, politikanë tranzitorë, kriminelë tranzitorë, qeveritarë tranzitorë, aktorë e muzikantë tranzitorë..”. Më habiti, por ja që paska patur të drejtë. Ai fliste nga eksperienca e vendit të tij, dhe ndoshta e kishte parashikuar në mënyrë perfekte, ç’ka do të ngjaste tek ne, pas 34 vitesh.
Shqipëria sot është në pikën më kritike të saj. Largimi i lugatëve, apo politikanëve me “aftësi të kufizuara” (pasi aftësia e tyre e vetme mbetet vjedhja dhe abuzimi me pushtetin) me votë, do tu japë mundësinë atyre që të mos duken më në skenën politike. Ka mbi 34 vjet, që lugati në PD, u shfaqet tre brezave të lindur qysh nga 1992 deri sot. Ka 34 vjet që ai dhe shpura e tij e “politikanëve me aftësi të kufizuara”, që po plaken në kolltukun e kryetarit të partisë, po i vijnë vërdallë e vërdallë sërish pushtetit, për ta marrë dhe për t’ju rikthyer vjedhjeve, grabitjeve, vrasjeve, rrënimeve. E vetmja aftësi e këtyre lugetërve politikanë, që tjerrin proceset gjyqësore, me mendimin se një ditë mund ti shpëtojnë ligjit, është vjedhja. Ata janë skarcot e tranzicionit, që harxhojnë miliona të vjedhura, për të paguar emisionet televizive, studio avokatore, mbushjen e rrugicave me njerëz të atrofizuar, por politikanë ata nuk janë dhe nuk bëhen kurrë.
Thotë një shprehje e urtë se “ti me para mund të blesh të ardhmen, por kurrë të shkuarën tënde”. Pra, ata mund ti derdhin milionat për të blerë ndonjë vendim gjykate, prokuror apo gjyqtar, por kurrë nuk do të mund ti heqin vehtes damkën e “hajdutit, të korruptuarit”. Ata kurrë nuk mund të kthehen gjithashtu në pushtet. Ata janë e shkuara, e vjetra, e grisura, e shëmtuara, e keqja e gjithkujt.
