Paskal Milo, ish-ministër i Jashtëm, me një karrierë të gjatë në politikë ka komentuar në një intervistë për gazetën TemA zhvillimet e fundit në vend.
Milo deklaroi se politika shqiptare është shndërruar në një “kënetë” pa hapësirë për alternativa demokratike.
Ai shton se vetëm liberalizimi i vërtetë i “tregut politik” mund t’i japë Shqipërisë një shans për ringritje demokratike.
“Ka ardhur koha që të ketë një rikompozim politik në Shqipëri. Shqipëria ndodhet në një situatë që nuk mund ta kapërcejë vetëm dhe thjesht me makinacione politike, apo me rikompozime ekzekutive.
Por, ka ardhur momenti që duhet të rikompozohet e gjithë jeta politike shqiptare. Dhe për të ndodhur kjo, politika shqiptare duhet të çlirohet nga ngërçi dhe nga dominimi absolut që i është bërë asaj, për shkak të ndryshimeve kushtetuese të vitit 2008, që përcaktuan gjithë këtë ecuri politike kontraverse shqiptare.
Aty është e keqja. Po s’u liberalizua tregu politik përmes krijimit të kushteve të përshtatshme për të patur një jetë pluraliste demokratike, përsëri Shqipëria nuk ka për shpëtuar nga shfaqje të tilla, ku është krijuar një kënetë politike.
Me plot fjalën po e them, është bërë Shqipëria një kënetë politike, sepse aty nuk ka më hapësirë për alternativa demokratike.”, tha Paskal Milo.
