Nga Majlinda Bregu
“Rinia përbën 21% të popullsisë së Ballkanit Perëndimor. Nëse marrim parasysh se: papunësia e të rinjve në Ballkanin Perëndimor është mbi 35%: duhen rreth 2 vjet që një i ri të fillojë punë pas përfundimit të shkollës; 25% e të rinjve nuk janë farë në proces punësimi, arsimimi ose trajnimi; 71% e të rinjve tanë po mendojnë të largohen nga rajoni dhe të gjejnë punë jashtë vendit – atëherë është shumë e qartë pse ky Lab i Parë Rajonal i Rinisë i kushtohet papunësisë së të rinjve”, tha Majlinda Bregu, Sekretare e Përgjithshme e Këshillit të Bashkëpunimit Rajonal (RCC) ) sot, në hapjen e “Western Balkans Youth Policy Lab on Employment”, Laboratorit të parë për Rininë e Ballkanit Perëndimor mbi Punësimin, të mbajtur online.
“Në vend që të krijojmë politika për të rinjtë, ne besojmë tek krijimi i politikave me të rinjtë. Ne besojmë në bashkëpunimin e të rinjve dhe politikëbërësve në mënyrë që ata të bashkë-krijojnë dhe bashkë-menaxhojnë politikat e rëndësishme, rinore së bashku. Edukimi, inovacioni, lidhja, bashkëpunimi dhe komunikimi janë çelësi për ju dhe për shoqëritë tona”.
Konferenca e parë mblodhi 40 të rinj dhe politikëbërës, anëtarë të Grupit Rajonal të Ekspertëve nga Ballkani Perëndimor që mbulojnë çështjet e të rinjve dhe tregut të punës, si dhe përfaqësues të organizatave rinore, komunitetit të donatorëve dhe mediave.
Në dy ditët e ardhshme Laboratori i parë Rajonal i Ballkanit Perëndimor për Rininë mbi Papunësinë e të Rinjve pritet të punojë së bashku me hartuesit e politikave të rajonit për zhvillimin dhe vendosjen e rekomandimeve, si dhe gjetjen e zgjidhjeve reale për punësimin dhe pjesëmarrjen e të rinjve.
“Brezat e rinj janë një fokus kryesor në të gjithë punën e Komisionit Evropian me Ballkanin Perëndimor dhe ne punojmë shumë për të krijuar një mjedis të tillë në rajon, në të cilin të rinjtë të shikojnë të ardhmen e tyre. Ky laborator i parë i Ballkanit Perëndimor me në fokus të rinjtë është një ngjarje e rëndësishme, përmes së cilës synojmë që politikëbërësit dhe të rinjtë të komunikojnë së bashku dhe të angazhohen më aktivisht në krijimin e politikave jo vetëm për vendet e tyre, por edhe për rajonin si një i tërë”, tha Genoveva Ruiz Calavera, Drejtore për Ballkanin Perëndimor në Drejtorinë e Përgjithshme të Komisionit Evropian për Politikën e Fqinjësisë Evropiane dhe Negociatat e Zgjerimit.
Stefan Gjorgjeviq, Sekretar i Përgjithshëm i Këshillit Kombëtar Rinor të Serbisë tha se “nëse u injektojmë të rinjve mendimin se politikëbërja është problemi i tyre, atëherë do t’i bëjmë ata ta shkundin dhe ndërtojnë shoqërinë sipas nevojave të tyre”.
“Le të përpiqemi t’u japim të rinjve më shumë vlera dhe t’u tregojmë atyre se me të vërtetë duam që të qëndrojnë në rajon dhe të kontribuojnë në rajon në mënyrën më të mirë të mundshme”, theksoi Jovana Majstorovic, Anëtare e Bordit të Forumit Rinor Europian.
Në dy vitet e kaluara RCC punësoi 14 të rinj, të cilët tani përbëjnë më shumë se 20% të kësaj organizate. Për herë të parë prezantuam programin e ‘Intership-it’ (praktikës) dhe 7 të tjerë u bashkuan me ne. Më shumë se 30 u bashkuan me ne në iniciativat dhe fushatat tona si Balkathon dhe STEM. Vetëm në aktivitetet e projektit tonë të Turizmit, më shumë se 140 pjesëmarrës ishin të rinj dhe pjesë e organizatave rinore./a.p
