Në zonën e Tiranës së Re në kryeqytet është gjetur dhe sekuestruar një mjet, i cili dyshohet se është përdorur nga grabitësit në Aeroportin e Rinasit. Burime nga policia thonë për “News 24”, se mjeti tip “Furgon” i cili është gjetur poshtë mbikalimit të Pallati me Shigjeta, dyshohet se është përdorur në grabitjen e 30 qershorit.
Mjeti po këqyret nga ekspertët për të gjetur gjurmë apo të dhëna të tjera në lidhje me hetimin.
Pas grabitjes në Aeroportin e Rinasit policia sekuestroi kamerat e bizneseve rreth aeroportit, si dhe në aksin Tiranë-Rinas.
Pas djegies së makinës që përdorën në pistën e avionëve, autorët e grabitjes në Rinas mendohet se kanë hipur në furgonin që është fiksuar të largohet në drejtim të Laknasit dhe të humbasë gjurmët, pa u gjetur destinacioni i tij.
Nga këqyrja e kamerave të sigurisë në rrugët e zonës më të zgjeruar larg Aeroportit, është konstatuar një furgon i dyshimtë.
Ky furgon duket që largohet nga vendi ku policia gjeti automjetin tip “Benz” teksa digjej, rreth 35 minuta pas grabitjes së ndodhur në pistën e Aeroportit./BW/a.k