Ndërkohë që qytetarët festojnë, policia është në gadishmëri të plotë. Blutë kanë hartuar një serë aktesh për garantimin e rendit dhe sigurisë publike sidomos në natën e ndërrimit të viteve ku mijëra qytetarë presin ardhjen e 2025.
Efektivët do të jenë me shërbim jo vetëm në sheshet festive, por edhe në disa akse për parandalimin e aksidenteve.
“Do të ketë shërbime të organizuar në akset rrugore nga policia rrugore, nga strukturat e policisë së rendit, Forcat Kombëtare të Sigurisë, të cilat do të ndihmojnë për lëvizjen e qarkullimit e mjeteve. Do të kemi shërbime të organizuara në sheshe, në vendet që kanë përcaktuar bashkitë për organizimin e festimeve, por edhe në vend të improvizuara që mund të përdoren nga qytetarët ku do të garantojmë shërbim të pandërprerë dhe një garanci për të gjithë shqiptarët kudo që ndodhen.“, thotë Drejtori i rendit publik, Agron Çeli.
Më shumë prani policore do të ketë në afërsi të lokaleve të natës, vende ku pritet që të ketë një fluks të qytetarëve që zgjedhin të fesojnë jashtë shtëpisë.
Përveç shesheve dhe vendeve që do të organizohen do të kemi shërbime në afërsi të lokaleve ku do të organizohen festime. Kemi planifikuar edhe bashkëpunimin me spitalet në të gjitha drejtoritë vendore, jo vetëm në kryeqytet, ku do të bashkëpunohet në rast se do të kemi incidente gjatë festimeve kryesisht të natës së fundvitit.
Policia ka shtuar dhe sportelet në pikat kufitare për të mos krijuar rradhë të gjata.
Shërbime të shtuara pasi do të hapen sportele me qëllim që të mos krijohen vonesa në pikat e kalimit kufitar. Të gjithë emigrantët duhet që ti garantojmë që të vijnë dhe të festojnë të qetë. Ka patur vitet e kaluara që janë krijuar dhe vonesa, por për këto festime mendojmë që nuk do të ketë vonesa. Është bashkëpunuar me strukturat homologe si me ato të Greqisë edhe me shtetet e tjera me qëllim që edhe ata të shtojnë shërbimet në pikat e kalimit kufitar.
Policia do të jetë në gadishmëri të plotë deri në ditët e para të janarit.
