Gjatë operacionit të përbashkët të zhvilluar nga toka, ajri, dhe uji mes policisë së Vlorës, të kufirit, forcave DELTA, FNSH Fier dhe Guarda di Finanzës italiane, janë zbuluar sasi kanabisi në qarkun e Vlorës.
Kontrollet u ushtruan në fshatrat e lumit Vjosë dhe përgjatë vijës bregdetare Vlorë-Himarë-Sarandë deri tek malet e Delvinës, ku janë shoqëruar 4 persona me të cilët po punohet për zbardhjen e ngjarjeve.
Në fshatin Vergo të Delvinës pranë vendit të quajtur “Shahino”, midis disa shkurreve janë gjetur 6 thasë të mëdhenj sintetikë të mbushura me 140 kilogramë kanabis.
Në fshatin Gjormë të Selenicës, janë zbuluar 70 bimë kanabisi të mbjella në një zonë të pyllëzuar, me lartësi nga 10 cm deri në 15 cm, të cilat u asgjësuan me djegie.
Përgjatë lumit Vjosë, shërbimet kanë konstatuar dhe bllokuar 2 mjete lundruese “Gomone” në fshatin Pish-Poro, të cilat dyshoheshin se ishin fshehur me qëllim për të trafikuar lëndë narkotike.
Policia e Vlorës thotë se vazhdojnë hetimet për arrestimin e autorëve të implikuar në këto veprimtari kriminale.
“Policia e Vlorës bën me dije se në ditët në vijim do të ketë kontrolle të rrepta me grupe pune të mirëorganizuara si dhe monitorimin e të gjithë territorit nga ajri, toka dhe uji me qëllim parandalimin e veprimtarive të paligjshme si dhe marrjen e masave për ndëshkimin e personave përgjegjës”, thuhet në një njoftim zyrtar të policisë së Vlorës. /b.d
