Policia gjermane bastisi në orët e mëngjesit të së martës zyrat qendrore të Federatës së Futbollit në përpjekje për të gjetur prova për akuzat e evazionit fiskal, akuza këto të lidhura me organizimin e Kupës së Botës 2006-të.
Sipas gazetës gjermane Bild, veç zyrave të federatës në Frankfurt, pjesë e kontrolleve janë bërë edhe shtëpitë e kreut aktual të federatës, Wolfgang Niersbach dhe paraardhësit të tij, Theo Zwanziger.
Ky aksion i autoriteteve gjermane mbërrin pas raportimeve për një fond të fshehtë prej 6.7 milionë eurosh, i përdorur për të siguruar vota që Gjermania të organizonte botërorin e 2006-ës.
Komitetit Organizativ i aktivitetit ka derdhur në arkat e FIFA 6.7 milionë Euro, gjë që u pranua edhe nga presidenti i atij komiteti Franc Beckenbauer.
Por ky i fundit mohoi në mënyrë kategorike se ky veprim ishte një blerje e të drejtës për organizimit të ngjarjes më të madhe futbollistike në botë dhe këtë e bëri në një komunikatë për median.
“Unë, si president i Komitetit Organizativ të Botërorit 2006, mbaj përgjegjësinë për gabimin e kryer në lidhje me transfertën e parave të bërë në drejtim të FIFA-s, por ne nuk i blemë votat për ta fituar të drejtën e zhvillimit të tij”, thotë Beckenbauer.
Lajmi për transfertën prej 6.7 milionë Euro u publikua nga revista gjermane ‘Der Spigel’, sipas së cilës kjo shifër u mundësua nga Shefi Ekzekutivv i asaj kohe i Adidas-it, Robert Luis Dreyfus.
Nga ana e saj, edhe vetë Federata Gjermane e Futbollit i hodhi poshtë akuzat e ngritura duke i cilësuar ato si të pabaza, por shtoi se gjithsesi po bën hetimet për këtë shumë të derdhur për llogari të FIFA-s.
Ndërkaq, presidenti i institucionit më të lartë në Gjermani, Wolfgang Nirschbah është kërkuar që në 4 nëntor të paraqitet përballë komisionit parlamentar në vend, por ai ende nuk ka deklaruar nëse do t’i përgjigjet pozitivisht kësaj kërkesë apo jo.
/ Top Channel
