Gjykata e Apelit në Tiranë i ka ndryshuar masën e sigurisë, Edmond Vogës, të arrestuar në janar të vitit 2020 për armë pa leje dhe me makinë të blinduar, nga arrest me burg, në “arrest shtëpiak”. Kështu, Edmond Voga do të duhet të qëndrojë gjatë fazës së hetimit, në banesën e tij në fshatin Halill të Fushë-Krujës.
Edmond Voga njihet për lidhjet e tij shoqërore me prokurorin e Durrësit Arjan Ndoja dhe me Landi Muharremin në Durrës, të cilëve iu bë atentat në nëntor 2019, ku të dy mbetën të plagosur.
Ky i fundit u kap me armë tip “TT” pa leje dhe dyshohet se dhunoi avokatin Ilia Ilia.
Ngjarja në fjalë, ndodhi përballë Gjykatës së Durrësit dhe u regjistrua nga kemarat e sigurisë. Pamjet ku Voga, së bashku me një tjetër personin dhunonin avokatin Ilia bënë xhiron e mediave në atë kohë. Për më shumë se një vit ai ishte në kërkim nga Policia, ndërsa ai qarkullonte i pashqetësuar me armë dhe me mjetin e tij të blinduar.
Voga u arrestua në aksin Vorë-Krujë, teksa po udhëtonte në një automjet të blinduar, pa dokumentat përkatëse dhe me armë pa leje.
g.kosovari
