Policia e Elbasanit ka reaguar pas pretendimeve të kandidatit të subjektit “Shqipëria Bëhet”, Oligert Hima, i cili deklaroi këtë të diel se pranë gjimnazit “Tomorr Sinani” në qytetin e Cërrikut ndodheshin persona që po intimidonin votuesit gjatë procesit zgjedhor.
Sipas njoftimit zyrtar të Policisë, menjëherë pas publikimit të denoncimit, shërbimet policore kanë shkuar në adresën e dhënë për të kryer verifikimet përkatëse. Nga kontrollet e kryera, nuk janë konstatuar persona të paautorizuar në afërsi të gjimnazit apo të qendrave të votimit.
“Në lidhje me pretendimet e njërit prej kandidatëve për zgjedhjet vendore, se pranë gjimnazit ‘Tomorr Sinani’ në qytetin e Cërrikut ndodheshin persona që po intimidonin qytetarët, shërbimet e Policisë kanë shkuar menjëherë në adresën e dhënë. Nga verifikimet e kryera, nuk janë konstatuar shtetas në afërsi, apo pranë gjimnazit ‘Tomorr Sinani’ në qytetin e Cërrikut. Gjithashtu, nuk ka patur persona të paautorizuar të grumbulluar jashtë Qendrave të Votimit dhe nuk është konstatuar asnjë problematikë.
Drejtoria Vendore e Policisë Elbasan mbetet plotësisht e angazhuar për të garantuar rendin, qetësinë dhe mbarëvajtjen e procesit zgjedhor, si dhe për të verifikuar me përgjegjësi çdo njoftim apo denoncim që mund të lidhet me këtë proces.”, thotë Policia.
Më herët, kandidati Oligert Hima kishte denoncuar publikisht se, sipas tij, në disa qendra votimi në Bashkinë e Cërrikut ishin vërejtur parregullsi dhe prani personash që intimidojnë votuesit. Ai kërkoi ndërhyrjen e menjëhershme të autoriteteve për të garantuar një proces të lirë e të qetë.
