Kreu Agjencisë Kombëtare të Mjedisit, Julian Beqiri publikoi sot gjatë një konference për shtyp të dhënat e monitorimit paraprak të cilësisë së ujërave larës përgjatë vijës bregdetare për vitin 2017.
Monitorimi i kryer gjatë muajit Maj 2017, rezulton se këtë vit plazhet shqiptare janë të një cilësie shumë të mirë.
Sipas analizave, 99 pika monitorimi rezultojnë cilësi shumë e mirë uji.
Kreu i AKM-së tha se se ndërsa kemi një cilësi shumë të mirë të ujërave larës, pastërtia e rërës lë shumë për të dëshiruar. Beqiri veçoi mungesën e koshave për për hedhjen e mbeturinave, mungesën e informacionit për pushuesit dhe tabelat me të dhëna për ujrat që mund t’u jepet pushuesve nga pushteti lokal.
Në bazë rezultateve të fazës paraprake të cilësisë së ujërave larës për vitin 2017 rezulton se:
– Cilësia e ujërave larëse është shumë e mirë në plazhet e Divjakës, Velipojës, Tales, Shëngjinit, Gjiri të Lalzit, Golemit, Qerretit, Spillesë, Orikumit, Zvërnecit, Vlorës, Dhërmiut, Himarës, Qeparoit, Borshit, Ksamilit, Sarandë, Semanit, Durrësit dhe Palasës.
– Cilësia është e mirë tek Shkolla e Marinës në Vlorë, tek Kanali i Çukës në Sarandë dhe tek Kompleksi Giardino në Durrës, ndërsa një vit më parë të tre pikat kanë rezultuar me cilësi të keqe të ujërave.
– Ndërsa cilësia e Ujërave larëse është përkeqësuar në 2 pika të plazhit të Durrësit në Plazhin Zhiron dhe Pas Kanalit tek Plepat.
Monitorimi paraprak i AKM-së për vitin 2017 është shtrirë në 102 pika nga 99 pika në vitin 2016 dhe 78 pika në vitin 2015 duke rritur në këtë mënyrë monitorimin gjatë gjithë vijës bregdetare. Për herë të parë është shtuar në listë Plazhi i Palasës me dy pika monitorimi që kanë rezultuar me cilësi shumë të mirë.
