Një 39-vjeçar është arrestuar në Himarë pasi dyshohet se po ndërtonte pa leje një objekt 5-katësh, ndërsa tre punonjës të Inspektoratit të Mbrojtjes së Territorit të Bashkisë Himarë janë shpallur në kërkim për shpërdorim detyre. Mes tyre është edhe kryeinspektori i IMT-së.
Sipas policisë, në vendin e quajtur “Sugë”, shërbimet kanë konstatuar një objekt 5-katësh, ku njëri prej kateve është nëntokë, i cili ishte në proces ndërtimi dhe nuk dispononte lejen përkatëse.
Pas konstatimit të shkeljes, policia ka vijuar me veprimet procedurale dhe ka arrestuar në flagrancë pronarin e objektit, shtetasin L. B., 39 vjeç, banues në Tiranë.
Por hetimi nuk është ndalur vetëm te pronari i objektit.
Në kuadër të të njëjtit procedim, Policia e Himarës ka shpallur në kërkim tre punonjës të Inspektoratit të Mbrojtjes së Territorit të Bashkisë Himarë, të dyshuar për veprën penale “Shpërdorimi i detyrës”.
Në kërkim janë shpallur:
D. H., 46 vjeç, banues në Tiranë, me detyrë kryeinspektor;
M. K., 31 vjeç, banues në Gjirokastër, me detyrë inspektor;
A. H., 42 vjeç, banues në Tiranë, me detyrë inspektor.
Sipas hetimeve paraprake, në fokus është mënyra se si një objekt i konsiderueshëm në përmasa ka vijuar të ndërtohet pa leje, ndërsa përgjegjësia e punonjësve të IMT-së lidhet me detyrën e tyre për kontrollin dhe mbikëqyrjen e territorit.
Policia ka bërë të ditur se po punohet për kapjen e tre punonjësve të shpallur në kërkim, si dhe për individualizimin dhe dokumentimin e plotë të përgjegjësive të tyre penale.
Ndërkohë, kontrollet dhe verifikimet në terren vijojnë, veçanërisht në zonat turistike të Himarës, ku gjatë sezonit veror rritet ndjeshëm presioni mbi territorin dhe aktiviteti ndërtimor. Materialet procedurale të këtij rasti i janë referuar Prokurorisë, për veprime të mëtejshme hetimore.
