5 turistë çekë kanë humbur rrugën teksa po eksploronin zonën e Jollës, në Pogradec, por për fat të mirë kanë arritur që të marrin ndihmën e policisë në kohë, duke bërë që të mos ketë pasoja tragjike. Turistët kanë njoftuar uniformat blu, të cilat pasi i kanë gjetur i kanë orientuar drejt rrugës që do duhet të ndiqnin.
“Policia e Pogradecit u vjen në ndihmë 5 turistëve çekë, të cilët kishin humbur rrugën, duke eksploruar zonën e Jollës.
Ditën e sotme, një grup punonjësish të Komisariatit të Policisë Pogradec, gjatë kontrollit të territorit, pasi kanë marrë njoftim se në fshatin Zgallë, njësia administrative Velçan,
5 turistë çekë kishin humbur rrugën duke eksploruar këtë zonë, kanë shkuar menjëherë në adresën e dhënë, ku kanë bërë të mundur lokalizimin e turistëve. Punonjësit e Policisë i kanë shoqëruar turistët dhe i kanë orientuar në rrugë, ku më pas ata kanë marrë edhe mjetet e tyre motorike. Turistët çekë kanë falënderuar punonjësit e Policisë, për ndihmën e ofruar”, thuhet në njoftimin e policisë.
Këto raste janë të shpeshta në vendin tonë, kryesisht me turistë të huaj, e më së shumti ato çekë. Kjo sepse çekët kanë natyrë aventuriere dhe zgjedhin që të eksplorojnë zonën pa guidë, e ku për fat të keq nuk kanë munguar edhe rastet tragjike, me humbje jete./m.j
