Në procesin penal “Plumbi i Artë”, ku bashkëpunëtorë të drejtësisë janë Nuredin Dumani, Erjon Alibej dhe Skerdi Tase, seanca gjyqësore e radhës u shoqërua me debate të forta mes palëve lidhur me vendosjen në dispozicion të gjykatës dhe mbrojtjes të disa akteve hetimore.
Në fokus të debatit ishin 6 akte që përmbajnë dëshmi të dhëna nga i pandehuri Erjon Alibej para prokurorëve gjatë hetimeve. Avokatët kërkuan që këto materiale të administrohen të plota në gjykim, ndërsa prokuroria argumentoi se aktet ndodhen në dosje dhe nuk ka vend për të diskutuar statusin e bashkëpunëtorit.
Prokurorja Doloreza Musabelliu tha: “Këto janë provat që kemi sjellë në gjykatë. Sa i takon marrëveshjes, ne e kemi në dosje. Nuk mund të vihet në diskutim statusi i bashkëpunëtorit. Më 29 qershor 2023 është lidhur marrëveshja. Vetëm organi që ia heq statusin është vetëm Organi i Akuzës.”
Nga ana tjetër, avokati Aldo Shkëmbi replikoi: “Ne jemi në gjykim të zakonshëm. Kërkesa jonë ka bazë ligjore. Nuk mund të na thuhet se sjellim çfarë të duam.”
Prokurori Behar Dibra reagoi ndaj kërkesës së mbrojtjes duke deklaruar: “Këto janë kërkesa të përsëritura. Kur morëm në pyetje Erjon Alibej, nuk u parashtrua kërkesa. Pyetjet duhet të bëhen mbi ato çfarë ka dhënë në seancë.”
Gjatë seancës, ndërhynë edhe të tjerë përfaqësues të palëve.
Avokati Henrik Ligori tha: “Ne duhet të kemi të plota deklarimet që ka edhe prokurori. Kjo është e pandershme. Nëse ka deklarime, ato do të duhej t’i kenë edhe palët në dispozicion.”
Avokati Përparim Kollulli shtoi: “Nëse përmendet emri i klientit tim, unë dua të njihem me to.”
Ndërsa Xhuljan Hoxha theksoi: “Nëse jemi për të vërtetën, duhet të jemi për të vërtetën dhe jo për trillime.”
Në përfundim të diskutimeve, Gjykata e Posaçme vendosi të urdhërojë Prokurorinë që të vendosë në dispozicion të palëve deklarimet e dhëna nga Erjon Alibej gjatë vitit 2022.
Seancat për çështjen “Plumbi i Artë” pritet të vijojnë me administrimin e provave dhe dëgjimin e dëshmitarëve.
