Selia e fushatës së Hillary Clinton në Bruklin është evakuuar për shkak të zbulimit të një pluhuri të bardhë në një zarf, i cili është dërguar të premten në zyrën e Manhatanit të Clinton, ku është hapur në orën 17:00 nga dy stazhistë.
Këta të fundit e kanë dërguar pastaj në selinë e fushatës në Bruklin. Policia bën me dije se katër persona janë ekspozuar nga pluhuri i bardhë.
Substanca pastaj rezultoi jo e rrezikshme, ndonëse priten analiza të tjera. Policia e Nju Jorkut ka hapur menjëherë një hetim lidhur me rastin.
“Pluhuri nuk është i rrezikshëm. Hetimet paraprake kanë verifikuar që testi ka dalë negativ sa u takon substancave të rrezikshme”, kanë shpjeguar krerë të policisë, duke saktësuar që Departamenti i Shëndetit po zhvillon hetime për të përcaktuar natyrën e substancës.
“Për momentin mund të përjashtojmë faktin që pluhuri ka pasur natyrë të dëmshme apo vdekjeprurëse”, kanë thënë zyrtarët policorë.
