E PËRDITËSUAR – Autoritetet amerikane njoftojnë se një person është arrestuar si i dyshuar për pako-bombat në adresë të 10 personave.
CNN zbardh skemën e mësipërme ndërsa shprehet se 12 pakot u janë dërguar 10 personave, të gjithë kritikë të Donald Trump.
Ndërkohë për të arrestuarin nuk ka detaje.
Nuk kanë fund pakot-bomba drejtuar kritikëve të Trump, por edhe redaksisë së CNN.
Kjo e fundit raporton se një pako e 12-ë i është adresuar edhe ish-Drejtorit të Inteligjencës Kombëtare, James Clapper.
Clapper e ka cilësuar aktin si ‘terrorizëm i brendshëm’, shkruan JavaNews.al
“Unë dhe bashkëshortja ime nuk ndodhemi në shtëpi. Dua të them se kushdo që e ka kritikuar Trumpin, duhet të ketë kujdes këto kohë. Ky është thjeshtë terrorizëm i brendshëm” – tha ish-kreu i DNI.
Ai u shpreh se pakot nuk do t’i ndalojnë zërat kritikë ndaj presidentit Donald Trump.
Po sot, senatori i Nju Xhersit Cory Booker mori një pako të tillë.
Policia ka rrethuar vendngjarjet në Florida dhe Nju Jork, pas sinjalizimeve.
***
Një pako e dyshimtë drejtuar demokratit Cory Booker është gjetur në Florida, raportojnë mediat amerikane.
Në të njëjtën kohë policia e Nju Jorkut tha se po hetonin një pako tjetër në Manhatan.
Booker është senator i Nju Xhersit dhe më parë ka mbajtur detyrën e kryebashkiakut të NewArk.
Lajmi erdhi pasi disa bomba-postare u dërguan tek kritikët e shquar të presidentit amerikan Donald Trump.
Ditë më parë, dy pako me eksplozivë u gjetën në shtëpitë e ish-Presidentëve Barack Obama dhe Bill Clinton. Të tjera pako janë gjetur edhe në shtëpinë e miliarderit George Soros, redakinë e CNN apo restorantin e aktorit të njohur Robert De Niro.
“Do të identifikojmë dhe arrestojmë personin apo personat përgjegjës për këto akte”, u tha gazetarëve një ditë më parë komisioneri i policisë së Nju Jorkut James O’Neill.
Të gjitha “pajisjet e dyshimta shpërthyese” janë dërguar në laboratorin e FBI që ndodhet në bazën detare të marinës në Kuantiko të shtetit të Virxhinias.
Sipas njoftimeve mediatike hetuesit po kërkojnë në mënyrë specifike në pjesën jugore të shtetit të Floridës, si vendi nga mund të kenë ardhur disa prej paketave.
/b.d
