Ish-kryeministri Sali Berisha ka sulmuar ashpër kryeministrin Rama lidhur me negociatat me Greqinë për çështjet e pazgjidhura mes dy vendeve. Ai u fokusua tek lajmi i mediave greke sipas të cilave ministri Kotzias ka deklaruar se hapsira detare e këtij shteti shtohet me 12 milje. Sipas Berishës, Edi Rama ka bërë aktin më antikombëtar. Ai ka mbrojtur edhe njëherë marrëveshjen e qeverisë së tij, edhe pse ajo u cilësua aso kohe antikushtetuese dhe sipas ekspertëve që e analizuan i falte territor Greqisë.
“Përjashtoj kreun e grupit parlamentar në mënyrë që të kalojë hajdutërisht dhe të zhduket nga parlamenti pasi ka bërë aktin më të rëndë në historinë 105–vjeçare të këtij vendi. Ka bërë pazarin e kufirit detar me Greqinë, në të cilin ministri i Jashtëm grek thotë se ‘fituam zgjerimin e ujërave me 12 milje’. Të gjithë ata që mendojnë se kjo deklaratë është propagandistike, gënjejnë veten e tyre. Ministri grek e ka deklaratën 100 % të vërtetë. Marrëveshja jonë ishte ajo që të takon në linjën e mesit, në distance të baraslarguar. Marrëveshja e tij është; ‘po të jap thërrime, llokmën po e mbaj për vete’. S’mund ta kalojë atë marrëveshje, pa kaluar mbi trupat tanë. Asnjë cm sdo kalojë. Do e paguaj me çdo çmim”, tha Berisha.
Më tej Berisha ka deklaruar se ekstradimi i Nezar Seitit u bë me urdhër të Tahirit, pasi njeriu kyç sipas tij, i bandës së Habilajve, kishte pranuar të bashkëpunonte me drejtësinë.
“Rama, në shkelje të kushtetutës ka përzënë nga Shqipëria, ka ekstraduar, personin kyç të bandës të Habilajve me urdhër të Tahirit, vetëm dy ditë pasi ai kishte shprehur vullnetin për tu bërë dëshmitar i penduar i mbrojtur i drejtësisë. Mjaftoi ky lajm që ai të përzihej me leckat e trupit. Ndërprerjen e hetimeve mund ta bëjë vetëm prokurori, askush tjetër, dhe me këtë akt, mendoj se do t’i shpëtojë”, deklaroi Berisha.
Po ashtu Berisha u ndal edhe te projekti i aeroportit të Vlorës, që e quan “aeroporti i Habilajve”.
“Një bandë hajdutësh që për këtë popull qeveri, në një akt të pashembullt, përjashtoi kryetarin e grupit parlamentar për të krijuar një situatë të cilën, të kalojë hajdutërisht ligjin e hajnisë më të madhe publike, aeroportit Habilaj, se kështu po e quaj se po bëhet me një çmim 5-6 herë më të madh se aeroporti i Kukësit. Çdo vlonjat, çdo qytetar e qytetarë duhet ta dijë se çfarë është mbi 20 milionë shkon në xhepat e Edi Ramës dhe individëve të tjerë që s’kanë lidhje me Vlorën e Shiqpërinë”, tha Berisha./a.m.
